• Басты бет
• Технологиялар
• Visa: Компаниялардың 50%-дан астамы шешім қабылдауды ЖИ-ге сеніп тапсыруға дайын

Visa: Компаниялардың 50%-дан астамы шешім қабылдауды ЖИ-ге сеніп тапсыруға дайын

Санжар Сүлейменовтің айтуынша, төлем нарығы жылдамдық, қауіпсіздік және автоматтандыру бағытына бет бұрып жатыр

Бизнес өкілдерінің жасанды интеллектіні пайдалануға дайындығы қарқынды дамып келеді. Visa деректеріне сәйкес, компаниялардың 77%-ы жасанды интеллектіні қазірдің өзінде қолданып жатыр немесе пилоттық режимде сынақтан өткізуде. Ал 71%-ы өз өнімдері мен процестерін AI-агенттермен өзара әрекеттесуге бейімдеуді жоспарлап отыр. Компаниялардың 53%-ы жасанды интеллект бизнес атынан келіссөз жүргізіп, шешім қабылдайтын сценарийге дайын екенін мәлімдеген.

Бұл туралы Visa компаниясының Қазақстан және Орталық Азия бойынша вице-президенті әрі өңірлік менеджері Санжар Сүлейменов GITEX AI Kazakhstan форумында айтты. Visa аталған іс-шараның серіктесі болды.

Спикердің сөзінше, жаһандық төлем нарығы жүйелі трансформация кезеңіне өтіп жатыр. Негізгі бағыттар – барынша жоғары жылдамдық, қауіпсіздік және үздіксіз пайдаланушылық тәжірибе.

«Біз офлайн, e-commerce және mobile кезеңдерінен кейінгі жаңа даму фазасына аяқ бастық. Енді басты рөл AI-агенттерге беріледі. Олар тек тауар таңдауға көмектесіп қана қоймай, клиент мүддесіне сай шешім қабылдап, сатып алулар жасап, транзакцияларды басқара алады», – деді Санжар Сүлейменов.

Мұндай модельде пайдаланушы әрекеттерінің бір бөлігі алгоритмдерге жүктеледі. AI-агенттер ұсыныстарды салыстырып, баға, мерзім және тұтынушы талғамы секілді параметрлерді ескеріп, белгіленген шектер аясында транзакцияларды орындайды. Осылайша қызметтермен өзара әрекеттесу қолмен таңдаудан автоматты орындауға ауысады. Бұл ретте интерфейстен гөрі деректер сапасы мен шешім қабылдау логикасы маңызды бола түседі.

Сонымен қатар төлем инфрақұрылымы да дамып келеді. Лезде жасалатын аударымдар, Account-to-Account (A2A) төлемдері мен цифрлық валюталар операцияларды жылдам әрі қолжетімді етеді. Төлем жасау күнделікті өмір сценарийлерінің ажырамас бөлігіне айналып барады.

Цифрлық сәйкестендіру төлем жүйесінің бір бөлігіне айналып, биометриялық технологиялар дәстүрлі аутентификация әдістерін толықтырып, біртіндеп алмастырып жатыр. Бұл пайдаланушы жолын жеңілдетіп, қауіпсіздікті күшейтеді.

Технологияларды ішкі қолдану тәсілі де өзгеруде. Бұрын AI көбіне сыртқы сервистерде пайдаланылса, қазір ол операциялық процестерге, автоматтандыруға және өнім әзірлеуге белсенді енгізіліп жатыр. Бұл өзгерістердің негізгі драйверлерінің бірі – банк секторы.

Орталық Азия да бұл үдеріске белсенді түрде қосылып отыр. Visa қолдауымен 2025 жылы жүргізілген «Орталық Азия қаржы нарықтарындағы жасанды интеллект. Қазіргі жағдайы мен перспективалары» зерттеуіне сәйкес, компаниялардың шамамен үштен бірі AI технологияларын қолданып жатыр, ал жартысынан астамы оны алдағы бір жыл ішінде енгізуді жоспарлап отыр.

Компаниялар жекелеген шешімдерден жүйелі трансформацияға көшуде. Негізгі нәтижелер қатарында өнімділіктің артуы, операциялық тиімділіктің жақсаруы, деректерді өңдеу жылдамдығы мен дәлдігінің өсуі, клиенттік сервистің дамуы және бизнеске арналған жаңа мүмкіндіктердің пайда болуы аталады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз