Қазақстан банктері шілдеге дейін бірыңғай QR-кодқа қосылуды аяқтайды
Бұл туралы Қаржы нарығын реттеу және дамыту агенттігінің төрайымы Мадина Әбілқасымова айтты
Қаржы нарығын реттеу және дамыту агенттігінің төрайымы Мадина Әбілқасымова Қазақстан банктері 2026 жылдың шілдесіне дейін банкаралық QR-төлемдер сервисіне қосылуды аяқтауы тиіс екенін айтты, деп хабарлайды Kapital.kz іскерлік ақпарат орталығы.
Ол бұл мәселе ұлттық төлем жүйесін құруға жауапты Ұлттық банк құзыретінде екенін атап өтті.
«Қосылу мәселесі қалды. Біз заң деңгейінде барлық банктер үшін бірыңғай QR-ды енгізу және оған қосылу міндетін қарастырдық. Бұл норма ағымдағы жылдың шілде айында күшіне енеді. Бірақ, біздегі мәліметтер бойынша, Ұлттық банк осы мерзімге дейін бірыңғай QR-ға қосылуды қамтамасыз ету үшін жұмыс жүргізіп жатыр», - деді ол Мәжіліс кулуарында.
Еске сала кетейік, 2024 жылы Қазақстанда екі банктің қатысуымен бірыңғай QR жүйесінің пилоттық режимі іске қосылған болатын. 2025 жылдың қарашасына қарай жүйеде алты банк жұмыс істеп тұрды. Ұлттық банк төрағасының кеңесшісі Бинұр Жәленов елдегі барлық банктермен бірыңғай QR-ды іске қосу бойынша келісімшарттарға қол қойылғанын хабарлаған еді.
2026 жылдың бірінші тоқсанының соңына дейін барлық банктердің клиенттері аталған сервисті толыққанды пайдалана алады деп жоспарланып отыр.
2026 жылғы наурыздың басында Президент Қазақстанның ірі банктеріне ескерту жасады. Бұл екінші деңгейлі банктер банкаралық QR-төлемдерге, аударымдарға қосылуды, сондай-ақ цифрлық теңгемен есеп айырысуды кешіктіріп жатыр, деп мәлімдеді Мемлекет басшысы.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
