Бірінші тоқсандағы Ұлттық қордың түсімі 784 млрд теңгені құрады
Былтырғы түсімдер 622 млрд теңгені құраған болатын
Ұлттық экономика вице-министрі Азамат Амрин мұнай бағасының өсуі неліктен азаматтардың табысында айтарлықтай өзгерістерге әкелмейтініне түсінік берді. Оның айтуынша, мұнай табыстарының әсері бірқатар параллельді процестермен теңестіріледі, деп хабарлайды Kapital.kz іскерлік ақпарат орталығы.
«Сіздер баға динамикасын көріп отырсыздар, шын мәнінде ол құбылмалы – 100 доллардан жоғары да, төмен де болады. Бәрі геосаясатқа байланысты. Екі құрамдас бөлік бар, біріншісі – мұнай бағасының артуы белгілі бір түсім береді. Бірақ (доллар) курсының төмендеуі сияқты қозғалыс та бар. Бюджетке тек мұнай бағасы ғана емес, сонымен қатар өндіру көлемі мен теңге курсы да әсер етеді. Бізде қазір болып жатқан экономикалық өсім мұнайсыз жүріп жатыр. Яғни, өткен жылмен салыстырғанда мұнай өндіру көлемінің төмендеуі байқалады. Сонымен бірге, бағаның өсуі өндіру көлемінің азаюы мен курстың төмендеуін жоққа шығарады. Бұл туралы айту әлі ерте, жыл ішінде белгілі болады», – деді Азамат Амрин Үкімет отырысында.
Қаржы вице-министрі Ержан Биржанов та, осыған ұқсас ұстанымды білдірді. Ол мұнай саласынан түсетін негізгі табыстар ағымдағы бюджетте емес, Ұлттық қорда жинақталатынын атап өтті.
«Салықтар бойынша негізгі бенефициар – Ұлттық қор. Барлық мұнай секторы салықтарды сонда төлейді. Бірінші тоқсанда Ұлттық қорға түсетін түсімдер көбейді, олар 784 млрд теңгені құрады. Өткен жылы түсімдер 622 млрд теңгені құраған болатын. Бұл да жақсы, бұл – болашақ кезеңнің ақшасы. Мұнай бойынша табыстар бірінші кезекте экспорттық-кедендік баж түрінде түседі. Дәл осы баж бойынша бюджетке қосымша 40,5 млрд теңге түсті», – деп түсіндірді ол.
Бұған дейін сәуір айында бюджетке трансферттер жасау үшін Ұлттық қордан 400 млн долларға дейін сату ниеті туралы хабарланған болатын.
Ұлттық қордың 2025 жылдың 11 айындағы инвестициялық табысы 13,7%-ды немесе 8,2 млрд долларды құрады, бұл 4,2 трлн теңгеге тең. Аудиторлар Ұлттық қорға 64 млрд теңгені қайтаруды ұсынады. Тексеру 3,4 трлн теңгенің 3 мыңнан астам бюджеттік инвестициялық жобаларын қамтыды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
