Алматы облысында алаяқтардың 500-ден астам жалған хабарландыруы бұғатталды
Биылғы бес айда ел аумағында жоқ қызмет түрлерін көрсетуге қатысты 1700-ден астам қылмыстық құқық бұзушылық тіркелген
Алматы облысында баспананы жалға беру туралы 500-ден астам жалған хабарландыру анықталып, өшірілді. Осыған байланысты құзырлы органдар қазақстандықтарды интернет арқылы үй брондау кезінде сақ болуды сұрайды, деп хабарлайды Капитал.kz іскерлік ақпарат орталығы облыстық прокуратураның баспасөз қызметіне сілтеме жасап.
«Жазғы маусым мен мектеп демалысы қарсаңында пәтерді тәулігіне жалға беру атын жамылған интернет-алаяқтық әрекеттері жиілейді. Қаскөйлер үйлер мен пәтерлердің суретін қойып, бағасын арзандатып, тартымды хабарландырулар жариялайды. Содан кейін әртүрлі сылтаумен алдын ала төлем немесе кепілпұл (депозит) талап етеді. Ақшаны қолға түсірген соң алаяқтар байланысқа шықпай қояды немесе көрсетілген мекенжайда ешқандай баспана жоқ екені белгілі болады», - деп ескертті прокуратурадан.
Қадағалау органының мәліметінше, биылғы бес айда ел аумағында жоқ қызмет түрлерін көрсетуге қатысты 1700-ден астам қылмыстық құқық бұзушылық тіркелген. Оның 130-ы Алматы облысында жасалған.
«Мұндай қылмыстардың алдын алу үшін Алматы облысының прокуратурасы ірі интернет-алаңдармен және цифрлық сервистермен бірлесіп жұмыс істеп жатыр. Мәселен, облыстық прокуратура мен «OLX Group» ЖШС арасындағы өзара іс-қимыл туралы меморандум негізінде интернет-алаяқтық деректерін анықтау және олардың жолын кесу шаралары тұрақты жүргізілуде. Бірлескен жұмыстың нәтижесінде сайт талаптарына сай келмейтін және заңсыз әрекет белгілері бар 518 хабарландыру анықталып, бұғатталды», - делінген ведомство хабарламасында.
Қазіргі уақытта прокуратураның тапсырмасымен киберполиция қызметкерлері осы хабарландыруларды жариялаған барлық авторларды тексеріп жатыр. Бұл шаралар алаяқтық контентті дер кезінде өшіруге, оның таралуын шектеуге және азаматтардың алданып қалмауына септігін тигізбек.
Алматы облысының прокуратурасы өңір тұрғындары мен қонақтарын интернет арқылы баспана брондау кезінде барынша сақ болуға шақырады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
