Трансұлттық қылмыстық топ құрды деген күдікті Польшадан елге экстрадицияланды
Бас прокуратураның мәліметінше, бұл қылмыстық топ банктік шоттар арқылы 2,8 миллиард теңгеден астам қаражатты заңсыз айналымға салған
Польшадан синтетикалық есірткі саудасымен және қылмыстық жолмен тапқан табысты заңдастырумен айналысқан трансұлттық қылмыстық топтың жетекшісі экстрадицияланды. Бұл туралы Kapital.kz іскерлік ақпарат орталығы Қазақстанның Бас прокуратурасының баспасөз қызметіне сілтеме жасап хабарлайды.
Қазақстан Республикасы Бас прокуратурасы мен Ішкі істер министрлігі интерполының қызметкерлері Қазақстанның Польшадағы Елшілігінің қолдауымен бұл елден Украина азаматын экстрадициялады. Оған аса ірі мөлшерде есірткі және психотроптық заттардың заңсыз айналымын ұйымдастырды, сондай-ақ трансұлттық қылмыстық топты басқарып, қылмыстық табыстарды заңдастырды деген айып тағылып отыр .
Арнайы прокурорлар тергеу барысында бұл азаматтың қылмыстық топ жетекшісі ретінде Telegram желісіндегі «Kaef Mafia» интернет-дүкені арқылы есірткі мен психотроптық заттарды жасырын қалдыру арқылы жүйелі түрде сатып келгенін анықтады.
Қылмыстық әрекеттер нәтижесінде банктік шоттарда 2,8 миллиард теңгеден астам қаражат айналып, Қазақстаннан тыс жерлерге шығарылған. Кейіннен қабылданған шаралардың арқасында бұл қаражат мемлекет пайдасына тәркіленді. Сонымен қатар, жедел іс-шаралар барысында осы қылмыстық топ мүшелерінен 1,2 кг есірткі және психотроптық заттар тәркіленді.
Ведомствоның мәліметінше, қылмыс әшкереленгеннен кейін топ мүшелерінің бір бөлігі сотталған. Ал оның ұйымдастырушысы тергеуден бой тасалап, оған халықаралық іздеу жарияланған болатын. Өткен жылдың желтоқсан айында ол Польша аумағында ұсталып, Бас прокуратураның сұрауы бойынша Қазақстанға жеткізілді.
Қазіргі уақытта айыпталушы тергеу изоляторына қамалды. Оған тағылған айыптар бойынша мүлкі тәркіленіп, 20 жылға дейінгі мерзімге бас бостандығынан айыру жазасы қарастырылған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
