Халық Кеңесінің құрамы қыркүйекте жасақталады
Бұл туралы Қасым-Жомарт Тоқаев Мемлекеттік туды көтеру рәсімі кезінде айтты.
Жаңа Конституция, бір палаталы Құрылтайға сайлау және Қазақстан Халық Кеңесін құру. Мемлекеттік туды көтеру рәсімі кезінде президент Қасым-Жомарт Тоқаев елді трансформациялаудың маңызды кезеңдерін белгіледі, деп хабарлайды Акорда баспасөз қызметі.
«Біз биыл Тәуелсіздіктің 35 жылдығын атап өтеміз.Бұл тарихи кезең жүріп өткен жолымызды жан-жақты терең талдауды және болашаққа стратегиялық жоспар құруды мұқият ойластыру тұрғысынан үлкен мәнге ие. Аталған мерейлі датаны қажырлы еңбекпен және нақты нәтижелермен қарсы алуымыз керек», деді ол.
Сонымен қатар президент конституцияның маңызы еселене түсетінін атап өтті.
«Еліміздің бас құжаты – Конституция 1 шілдеден бастап күшіне енеді. Тамыз айында бір палаталы Құрылтай сайлауы өтеді, ал қыркүйекте Қазақстан Халық Кеңесі құрылады. Осылайша, біз ауқымды өзгерістер кезеңіне аяқ басамыз. Қазірдің өзінде халқымыздың болмысы, құндылықтары, сана-сезімі, тіпті, дүниетанымы өзгеріп жатыр. Азаматтарымыздың басым көпшілігі заңға құрметпен қарау, қоғамдық тәртіпті нығайту стратегиясын қолдайды, сондай-ақ «Таза Қазақстан» акциясына белсене қатысады. Алайда бұл әр жетістікке мәз болып, жайбарақат отыратын заман емес. Біз биік мақсаттарға ұмтылып, тек қана алға – жарқын болашаққа қарай жүруіміз керек. Келешекке зор сеніммен қарап, Қазақстанды шын мәнінде өркениетті мемлекетке айналдыруымыз қажет», деп қосты Тоқаев.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
