Қазақстанда мектептер мен лагерьлерге ауқымды тексеріс басталады
Жазғы демалыс орындарының жартысына жуығы әлі өтінім бермеген
2026 жылдың жазынан бастап Қазақстанда бюджет есебінен қаржыландырылатын балалар мекемелерінің қауіпсіздігін мемлекеттік бақылаудың ерекше тәртібі енгізіледі. Заңнамадағы өзгерістер мен санитариялық-эпидемиологиялық бақылауды күшейту туралы үкімет отырысында денсаулық сақтау министрі Ақмарал Әлназарова айтты, деп хабарлайды үкіметтің баспасөз қызметі.
Оның айтуынша, жаңа тәсілдер соңғы үш жылда тіркелген топтық инфекциялық аурулардың алдын алуға бағытталған.
1 маусымнан бастап мектептер мен сауықтыру орталықтарына мониторинг жүргізіледі, ал 1 шілдеден барлық аталған нысандарда ауқымды жоспарлы тексерістер басталады. Ерекше тәртіп жүйелі заңбұзушылықтарға жедел әрекет етуге мүмкіндік береді. Олардың қатарында көбіне ғимараттардың санитариялық-техникалық жағдайының қанағаттанарлықсыз болуы, ас блоктарындағы мәселелер және рұқсат құжаттарының болмауы анықталады.
«Жыл басынан бері мектептерде 347 тексеріс жүргізілді, оның ішінде 49 ас блогы тексерілді. Негізгі заңбұзушылықтар жүйелі сипатқа ие: жекелеген мектептердің апаттық жағдайы; үй-жайлардың санитариялық-техникалық жағдайының қанағаттанарлықсыз болуы; санитариялық-эпидемиологиялық қорытындылардың болмауы. Аталған факторлар балалардың санитариялық-эпидемиологиялық ахуалына кері әсер етеді. Осыған байланысты биыл мемлекет басшысы мемлекеттік бюджеттен қаржыландырылатын балалар болатын нысандарды мемлекеттік бақылаудың ерекше тәртібін енгізуді көздейтін заңға қол қойды», – деді министр.
Ол биылғы маусымда 187 жазғы сауықтыру ұйымын ашу жоспарланып отырғанын, алайда қазіргі уақытқа дейін олардың тек 53%-ы ғана өтінім бергенін қосты.
«Тиісті рұқсат құжаттары жоқ жекеменшік лагерьлердің қызметі ерекше алаңдаушылық туғызады. Анықталған барлық фактілер бойынша материалдар прокуратура, полиция органдарына және жергілікті атқарушы органдарға жолданып, тиісті шаралар қабылданды», – деді министр.
Еске салайық, бұған дейін Қазақстан мектептерін «кенеттен тексеру» қағидаты бойынша тексеретіні хабарланған болатын. Ерекше бақылау мен қадағалауға жататын білім беру нысандарының тізілімі жасалады.
2025 жылы Қазақстандағы мектеп асханаларын ескертусіз тексеретіні хабарланған еді. Сондай-ақ Ақмарал Әлназарова мектептерде тамақ дайындау процесін медицина қызметкерлері бақылап отыратынын айтқан болатын.
2024 жылы Маңғыстау облысының Бесшоқы ауылында оқушылар жаппай уланып, 83 бала ауруханаға жатқызылған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
