Қазақстандық жасөспірімдердің 70%-дан астамы еңбек шартынсыз жұмыс істейді
Еңбек министрлігі кәмелетке толмағандардың еңбек құқықтары жаппай бұзылып жатқанын мәлімдеді
Еңбек және халықты әлеуметтік қорғау министрлігі жүргізген 100 мың респондент қатысқан сауалнама жұмыс тәжірибесі бар жасөспірімдердің басым бөлігі ресми рәсімдеусіз еңбек ететінін және көбіне заң талаптарына сай келмейтін жағдайда жұмыс істейтінін көрсетті. Осыған байланысты ведомство Еңбек кодексі мен жұмыскерлерді міндетті сақтандыру туралы заңға түзетулер әзірлеп жатыр. Бұл туралы еңбек министрі Асқарбек Ертаев мәлімдеді, деп хабарлайды Kapital.kz іскерлік ақпарат орталығының тілшісі.
«Өткен жылдың қазан айынан биылғы сәуірге дейін еңбек нарығында 18 жасқа дейінгі тұлғаларды жұмысқа қабылдау мәселелері бойынша зерттеу жүргізілді. Сауалнамаға балалар мен олардың ата-аналары қатарынан шамамен 100 мың респондент қатысты. Сауалнамаға қатысқан оқушылардың 16,2%-ының базалық жұмыс тәжірибесі бар», – деді Асқарбек Ертаев үкімет отырысында.
Оның айтуынша, зерттеу нәтижелері кәмелетке толмағандардың еңбек құқықтарының жүйелі түрде бұзылу қаупін анықтады: жасөспірімдердің 70%-дан астамы ресми рәсімдеусіз жұмыс істейді, 51%-ға дейіні түнгі уақытта еңбек етеді, ал шамамен 10%-ы жалақының кешіктірілуіне немесе мүлде төленбеуіне тап болады.
Осы деректерге байланысты министрлікте Еңбек кодексіне, сондай-ақ «Қызметкерді еңбек міндеттерін атқару кезінде жазатайым оқиғалардан міндетті сақтандыру туралы» заңға түзетулер әзірленіп жатыр. Жаңа нормалар кәмелетке толмаған жұмыскерлердің құқықтық қорғалуын күшейтуге және балалар еңбегі саласындағы заңбұзушылықтар үшін жұмыс берушілердің жауапкершілігін арттыруға бағытталған.
Айта кетейік, үкімет отырысында ғылым және жоғары білім министрі Саясат Нұрбек жоғары оқу орындарына бөлінетін 90 мыңға жуық грант инженерлік және педагогикалық мамандықтарға бағытталатынын мәлімдеді.
Биыл Қазақстанда шамамен 240 мың талапкер ҰБТ тапсырады. Ал оқу-ағарту министрі Жұлдыз Сүлейменова қазақстандық мектеп түлектеріне қай жерлерде бітіру кештерін өткізуге тыйым салынғанын айтты.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
