Инженерлік және педагогикалық мамандықтарға 90 мыңға жуық грант бөлінеді
Келесі оқу жылына арналған мемлекеттік тапсырыстың басым бөлігі 2030 жылға дейін сұранысқа ие болатын мамандықтарға бағытталған
Қазақстанда жаңа оқу жылына кадр даярлауға арналған мемлекеттік тапсырыс көлемі өткен жылдар деңгейінде сақталады. Бұл туралы үкімет отырысында ғылым және жоғары білім министрі Саясат Нұрбек мәлімдеді, деп хабарлайды Kapital.kz іскерлік ақпарат орталығының тілшісі.
Ғылым және жоғары білім министрлігінің мәліметінше, 2026–2027 оқу жылына 89 457 білім гранты қарастырылған. Қаржыландырудың негізгі бөлігі дәстүрлі түрде бакалавриат бағдарламаларына бағытталады.
«Алдағы 2026-2027 оқу жылына 89 457 мемлекеттік грант бөлінді. Оның ішінде: 75 371-і – бакалавриатқа, 11 007-сі – магистратураға, 3 079-ы – докторантураға арналған. Мемлекеттік тапсырысты бөлу ел экономикасының 2030 жылға дейінгі кадрлық қажеттілігі болжамымен үйлестірілді», – деді Саясат Нұрбек.
Болжамдарға сәйкес, алдағы жылдары елге 883 мыңнан астам білікті маман қажет болады. Ең үлкен кадр тапшылығы инженерлік-техникалық салада күтіледі — шамамен 530 мың маман. Бұдан бөлек, білім беру жүйесіне 185 мыңнан астам маман қажет болса, тағы 168 мыңға жуық бос жұмыс орны экономиканың өзге салаларына тиесілі болады.
Осы есептерді ескере отырып, гранттарды бөлу кезінде инженерлік, IT, аграрлық, педагогикалық және жаратылыстану бағыттарына басымдық берілді.
«Сондықтан гранттарды бөлу кезінде инженерлік, IT, аграрлық, педагогикалық және жаратылыстану бағыттарына басымдық берілді. Гранттардың 60%-ы инженерлік-техникалық және ауыл шаруашылығы мамандықтарына, 21%-ы педагог кадрларды даярлауға бағытталды», – деп қосты министр.
Айта кетейік, Саясат Нұрбек бүгін сондай-ақ биыл Қазақстанда ҰБТ-ны шамамен 240 мың талапкер тапсыратынын мәлімдеді. Ал оқу-ағарту министрі Жұлдыз Сүлейменова қазақстандық мектеп түлектеріне қай жерлерде бітіру кештерін өткізуге тыйым салынғанын айтты.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
