Қазақстанда мектеп бітіру кештерін өткізуге қай жерлерде тыйым салынды
Әкімдіктер мен полиция тәртіпті бақылауда ұстайды
Қазақстандық мектеп түлектеріне аттестат тапсыру салтанаты 2026 жылғы 17-18 маусымда өтеді. Мерекелік іс-шараларды тек мектептердің және басқа да білім беру ұйымдарының аумағында өткізуге рұқсат етілген. Бұл туралы оқу-ағарту министрі Жұлдыз Сүлейменова мәлімдеді, деп хабарлайды Kapital.kz іскерлік ақпарат орталығы тілшісі.
«Бітіру іс-шараларын өткізу тек білім беру ұйымдарының базасында қарастырылған. Ресторандарда, кафелерде және банкет залдарында бітіру кештерін ұйымдастыруға, сондай-ақ заңсыз ақша жинауға тыйым салынады. Осыған байланысты оқу-ағарту министрлігі мен жергілікті атқарушы органдардың бірлескен бұйрығы қабылданды. Әкімдіктерге бұл мәселені ішкі істер органдарымен бірлесіп қатаң бақылауда ұстау тапсырылды», – деді Жұлдыз Сүлейменова үкімет отырысында.
2026 жылы елімізде 3 млн 900 мың оқушы білім алған. Олардың 343 мыңы 9-сыныпты, 215 мыңы 11-сыныпты аяқтайды. «Алтын белгі» үміткерлерінің саны 13 175 адамды (6%), ал үздік аттестат алуға 11-сынып бойынша 18 555 түлек, 9-сынып бойынша 31 181 оқушы үміткер.
Сонымен қатар, 763 колледжде 556 мыңнан астам студент оқиды. Биыл 168 мың студент оқуын аяқтайды, оның ішінде 50 мыңы жұмысшы мамандықтар бойынша, 47 мыңы дуалды оқыту жүйесі бойынша білім алған.
Бұған дейін мәжіліс депутаты Асхат Аймағамбетов Қазақстанда ауқымды бітіру кештерін шектеу туралы шешімге қатысты пікір білдірген болатын. Оның айтуынша, бастаманы қолдайтындар да, қарсы шығушылар да бар, алайда билік ең алдымен қауіпсіздік пен әлеуметтік әділеттілік мәселесін негізге алып отыр. Депутаттың сөзінше, ата-аналардан қымбат мерекелерге байланысты қаржылық жүктеменің ауыр екені туралы көптеген өтініштер түсіп жатыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
