Тоқаев Кения президентіне І дәрежелі «Достық» орденін табыстады
Қасым-Жомарт Тоқаев бүгінгі келіссөздер қазақ-кения қатынастарын тереңдетуге берік негіз қалағанын айтты
Мемлекет басшысы Кения президенті Уильям Рутоға І дәрежелі «Достық» орденін табыстады, деп хабарлайды Kapital.kz іскерлік ақпарат орталығы Ақорданың баспасөз қызметіне сілтеме жасап.
Қасым-Жомарт Тоқаев сөйлеген сөзінде бүгінгі мазмұнды жоғары деңгейдегі келіссөздер қазақ-кения қатынастарын одан әрі тереңдетуге және оларды жаңа деңгейге шығаруға берік негіз қалағанын атап өтті.
«Қарым-қатынасымызды дамытудағы күш-жігеріңіз ерекше маңызға ие. Сізді Қазақстанда сенімді дос және халықаралық деңгейдегі көрнекті мемлекет қайраткері ретінде таниды. Кенияны экономикалық тұрғыдан өркендетуге, елді жаңғыртуға, халықтың әл-ауқатын арттыруға бағытталған ауқымды реформаларыңыз құрметке лайық», – деді мемлекет басшысы.
Қазақстан президенті Уильям Рутоның сындарлы диалогқа тұрақты бейілділігі Африкадағы бірлікті нығайтуға және әлемдік қауымдастықпен мазмұнды серіктестікті дамытуға ықпал етіп отырғанын айтты.
«Қазақстан мен Кения арасындағы ынтымақтастықты нығайтуға елеулі үлес қосқаныңызды ескере отырып, Сізге І дәрежелі «Достық» орденін тапсыруды зор мәртебе санаймын. Бұл жоғары марапат – Қазақстанның шексіз құрметі мен ризашылығының, сенім мен өзара құрметке негізделген қарым-қатынасты жандандыру ниетінің белгісі», – деді Қасым-Жомарт Тоқаев.
Кения президенті жоғары награда үшін Қазақстан басшысына алғыс білдірді.
«Орденді таққан кезде бірлік, құрмет пен ынтымақ сияқты құндылықтарға ықыласым арта түскенін сезіндім. Мен аталған жоғары марапатты үйлесімді өркендеу жолында Қазақстан халқымен тізе қосып, әрекет етіп келе жатқан Кения жұртының атынан қабылдаймын. Осы арқылы серіктестігіміз бекіп, екі ел арасындағы достық ұрпақтан ұрпаққа жалғасады деп сенемін», – деді Уильям Руто.
Еске салайық, Кения президенті Уильям Руто Қазақстанға мемлекеттік сапармен келді. Тәуелсіздік сарайында Кения президентін ресми қарсы алу рәсімі өтті. Кейін Қасым-Жомарт Тоқаев пен Уильям Руто шағын құрамда келіссөз жүргізді. Қазақстан президенті Уильям Рутоға Астанаға сапары және өзімен бірге іскер топ өкілдерінен құралған делегацияны алып келгені үшін ризашылық білдірді. Кеңейтілген құрамдағы келіссөздер барысында мемлекет басшысы Кенияға Іскерлік кеңес құруды ұсынған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
