Алматыда бірқатар көше біржақты қозғалысқа ауыстырылуы мүмкін
Қалада жаңа автобус жолақтарын ашып, веложолдардың ұзындығын 125 шақырымға дейін жеткізу жоспарланып отыр
Алматыда қоғамдық көлікке арналған арнайы жолақтар желісін кеңейту, велоинфрақұрылымды дамыту және кейбір көшелердегі қозғалыс сызбасын өзгерту жоспарланып отыр. Бұл туралы қала әкімдігінің баспасөз қызметіне сілтеме жасап, Kapital.kz іскерлік ақпарат орталығының тілшісі хабарлайды.
«Заманауи табысты қала – бұл ең алдымен автокөліктер үшін емес, адамдар үшін қолайлы қала. Сондықтан бүгінде әлемнің жетекші мегаполистері қоғамдық көлікті дамытуға, велоинфрақұрылым құруға және көшелердің қауіпсіздігін арттыруға басымдық беріп отыр. Бір автобус жолағы қарапайым автокөлік жолағына қарағанда әлдеқайда көп адамды тасымалдай алады», – деді Алматы қалалық жол қозғалысын ұйымдастыру және жолаушылар көлігі басқармасының басшысы Ержан Диханбаев.
Осыған байланысты Алматы әкімдігі әл-Фараби даңғылында, Тілендиев, Шевченко, Құрманғазы, Сәтбаев, Өтеген батыр, Рысқұлов көшелерінде, сондай-ақ Шығыс айналма автомобиль жолы мен Солтүстік айналма жолда жаңа арнайы автобус жолақтарын ашу мүмкіндігін қарастырып жатыр.
Қалада велосипед инфрақұрылымын дамыту да жалғасады. 2026 жылы веложолдардың жалпы ұзындығын 87 шақырымнан 125,5 шақырымға дейін ұлғайту көзделген.
Сонымен қатар әкімдік бірнеше көшеде біржақты қозғалыс енгізу және жол қозғалысы сызбаларын ірі бюджет шығындарынсыз, негізінен жаңа жол таңбалары мен қозғалысты ұйымдастыруды оңтайландыру есебінен өзгерту мүмкіндігін қарастыруда.
Өзгерістер «Тастақ» базары маңындағы Брусиловский, Тұркебаев, Қарасай батыр, Құлымбетов және Прокофьев көшелерін, сондай-ақ Әуезов – Байзақов, Жуков – Уәлиханов және Радостовец көшелерінің учаскелерін қамтиды.
Мамандар Тимирязев, Жандосов, Манас, Мыңбаев, Береговая, Армянская, Айманов және Пушкин көшелерінде де біржақты қозғалыс енгізу мүмкіндігін пысықтап жатыр.
«Біз жедел пилоттық шешімдерді белсенді енгізіп келеміз. Алдымен өзгерістер жол таңбалары мен уақытша қозғалыс сызбалары арқылы сынақтан өткізіліп, оң нәтиже болған жағдайда кең ауқымда қолданылады. Бұл елеулі шығынсыз жол жағдайын икемді әрі тиімді жақсартуға мүмкіндік береді. Жаңа қозғалыс сызбалары көшелердің өткізу қабілетін 20–25%-ға дейін арттырып, жол-көлік оқиғаларын 35%-ға дейін азайтады және қаланың негізгі көлік тораптарына түсетін жүктемені төмендетеді деп күтілуде», – деді Ержан Диханбаев.
Оның айтуынша, бүгінде Алматыда 206 тұрақты қалалық және қала маңындағы бағытқа қызмет көрсететін 26 тасымалдаушы жұмыс істейді. Қаладағы автобус паркінде 3 108 автобус бар. Оның ішінде 1 564-і газбен жүретін автобус, 137-сі электробус, 156-сы троллейбус және 1 251-і дизельді автобус.
Алматыда барлығы 2 261 аялдама пункті бар, олардың 2 089-ы автопавильондармен жабдықталған. Оның 1 005-і жергілікті бюджет есебінен, ал 1 084-і жеке инвестиция есебінен орнатылған. 2025 жылы қалада 56 жаңа автопавильон қойылса, биыл тағы 200-ден астамын орнату жоспарланған.
Бұған дейін Алматыда Бөгенбай батыр көшесінің оңтүстігі, Абай даңғылының солтүстігі, Желтоқсан көшесінің шығысы және Достық даңғылының батысы аралығындағы аумақта төмен шығарындылар аймағының (LEZ) техникалық пилоттық жобасы іске қосылғаны хабарланған болатын.
Сондай-ақ 2026 жылы Алматының көлік қаңқасын қалыптастыруға жергілікті бюджеттен қосымша 19,7 млрд теңге бөлу жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
