Қазақстанда билет алып-сатарларына қарсы шаралар қарастырылуда
Мәселе Туризмді дамыту жөніндегі үйлестіру кеңесінде талқыланады
Қазақстанда танымал іс-шараларға билеттерді алып-сатарлар арқылы қайта сатуға қарсы күрес күшейтіле ме? Бұл мәселе туралы Орталық коммуникациялар қызметінде өткен брифингте Туризм индустриясы комитеті төрағасының міндетін атқарушы Нұрбол Байжанов мәлімдеді, деп хабарлайды Kapital.kz орталығының тілшісі.
Журналист бұл көптеген елдерде өзекті мәселе күйінде қалып отырғанын айтып, Оңтүстік Корея тәжірибесін мысалға келтірді. Ол жақта қатаң айыппұлдар, сатып алушыларды сәйкестендіру жүйесі және бір қолға сатылатын билет санына шектеу енгізілген. Осыған байланысты Қазақстанда да осындай тетіктерді енгізу мүмкіндігі туралы сұрақ қойылды.
«Бұл – туризмді дамыту және шетелдік туристерді тарту тұрғысынан өте өзекті мәселе. Біз оны бақылауда ұстап, пысықтап жатырмыз», – деді Нұрбол Байжанов.
Оның айтуынша, мәселе бірнеше саланың қатысуын талап етеді, соның ішінде мәдениет және спорт министрлігі мен жасанды интеллект және цифрлық даму министрлігі бар.
«Туроператорлар алдын ала туристік өнімдерді қалыптастырып, шетелдік туристерді іс-шараларға тарта алуы маңызды. Бізге іс-шаралар кестесін алдын ала білу және соған сәйкес ілгерілету жұмыстарын жүргізу қажет», – деді ол.
Спикер бұл мәселені Туризмді дамыту жөніндегі үйлестіру кеңесіне шығару жоспарланып отырғанын айтты.
«Бұл кеңес премьер-министрдің өкімімен құрылған. Сол жерде басқа мемлекеттік органдардың қатысуын талап ететін мәселелерді қарастырамыз», – деді Нұрбол Байжанов.
Оның сөзінше, Оңтүстік Корея моделін толықтай енгізу мәселесін қазір айту ерте.
«Корея тәжірибесін 100% қолданамыз деп айта алмаймын», – деп түйіндеді ол.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
