Реджеп Тайип Эрдоган: Қазақстанға мемлекеттік сапарымызды ұмытпаймыз
Түркия президенті Қазақстанның «ерекше қонақжайлығын» атап өтті
Қазақстан президенті Қасым-Жомарт Тоқаев пен Түркия президенті Реджеп Тайип Эрдоган шағын құрамда келіссөздер өткізді, деп хабарлайды Ақорда баспасөз қызметі.
«Ең алдымен, менің шақыруымды қабыл алып, Қазақстанға мемлекеттік сапармен келгеніңіз үшін шын жүректен ризашылығымды білдіргім келеді. Сапарыңыздың мән-мағынасы ерекше, өте жоғары деп айтсақ артық болмайды. Себебі бұл, шын мәнінде, тарихи оқиға. Бұл сапар елдеріміздің ынтымақтастығына үлкен серпін беретініне ешқандай күмән жоқ. Екі ел арасында тек қана достық, бауырластық, мәңгілік серіктестік қарым-қатынас қалыптасқан. Арамызда ешқандай түйткіл немесе шешілмеген мәселе жоқ», – деді мемлекет басшысы.
Қасым-Жомарт Тоқаев өткен жылы Түркияға жасаған ресми сапары барысында қол жеткізілген келісімдерді еске салды.
«Біз Анкарада Стратегиялық ынтымақтастық жөніндегі комиссияның бесінші отырысын өткіздік. Өте маңызды шешімдерге қол жеткіздік. Бүгін Кеңестің алтыншы отырысы болады. Ауқымды бизнес форум өтеді. Өзіңізбен бірге Астанаға үлкен делегация келді. Сондықтан сапарыңыз ойдағыдай өтеді деп ойлаймыз. Осылайша, өзара ынтымақтастығымыздың жарқын болашағына зор қадам жасаймыз», – деді президент.
Өз кезегінде Түркия президенті Қазақстан тарапына көрсетілген жылы қабылдау үшін алғыс білдірді.
«Ең әуелі, бауырымыздың атажұртқа арнайы шақырғанына ризашылығымды білдіргім келеді. Бізге айрықша қонақжайлық танытып отырсыздар. Қазақ елінің шекарасынан өткеннен қапталдаса ұшқан ұшақтармен қарсы алып, менің делегацияма үлкен құрмет көрсеттіңіздер. Бұл бізді ерекше қуантты. Әрине, мұны ұмытпаймыз. Бүгінгі сапар бауырлас халықтардың ынтымағын арттыруға зор септігін тигізеді деп сенемін», – деді Реджеп Тайип Эрдоган.
Еске салайық, 13 мамыр 2026 жылы Түркия президенті Қазақстанға мемлекеттік сапармен келген болатын. Тараптар екіжақты қатынастардың қазіргі жай-күйі мен даму перспективаларын талқылайды. Сондай-ақ Қазақстан мен Түркия арасындағы Стратегиялық ынтымақтастық жөніндегі жоғары деңгейлі кеңестің алтыншы отырысы өтеді. 15 мамырда Түркістанда Түркі мемлекеттері ұйымына мүше елдер көшбасшыларының бейресми саммиті өтеді. Саммиттің тақырыбы – «Жасанды интеллект және цифрлық даму».
Түркия – Қазақстанның негізгі бес сауда серіктесінің бірі. 2025 жылы екі ел арасындағы тауар айналымы 9%-ға артты. Соның ішінде қазақстандық тауарлар экспорты 17,7%-дан астам өсіп, 3,9 млрд долларға жетті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
