eGov, e-Otinish және Aitu сервистері интернетсіз де қолжетімді болуы мүмкін
Мәжілісте телеком-нарық пен деректерді өңдеу орталықтарын дамытуға арналған заң жобасы қаралып жатыр
Қазақстанда телекоммуникация нарығы мен деректерді өңдеу орталықтарын дамыту мәселелеріне арналған заң жобасы талқылануда. Мәжілісте бірінші оқылымда қаралған құжат цифрлық сервистерге қолжетімділікті кеңейтуге және телеком саласын реттеуді күшейтуге бағытталған нормаларды қамтиды, деп хабарлайды Kapital.kz іскерлік ақпарат орталығы тілшісі.
Заң жобасындағы негізгі жаңашылдықтардың бірі – әлеуметтік маңызы бар мемлекеттік платформаларға тегін қолжетімділік беру. Бұл азаматтарға интернет-трафикке төлем жасалмаған немесе шотта қаражат болмаған жағдайда да негізгі мемлекеттік сервистерді пайдалануға мүмкіндік береді.
«Түзетулердің алғашқы блогында eGov, e-Otinish, ұлттық Aitu мессенджері және басқа да қосымшалар сияқты әлеуметтік маңызы бар цифрлық сервистерге нетарифтік қолжетімділік беру ұсынылады. Бұл азаматтарға баланста қаражат болмаса да негізгі мемлекеттік қызметтерді пайдалануға жол ашады», – деді премьер-министрдің орынбасары – жасанды интеллект және цифрлық даму министрі Жаслан Мәдиев.
Түзетулердің тағы бір блогы байланыс операторлары жұмысының ашықтығын арттыруға бағытталған. Компаниялар кеңейтілген қаржылық есептілікті жариялауға, сондай-ақ байланыс тораптары, үлгілік келісімшарттар, қосылу шарттары мен инфрақұрылымға қолжетімділік тарифтері туралы ақпаратты ашуға міндеттеледі.
«Байланыс сапасын жақсарту үшін ұялы байланыс сигналының күшейткіштері – репитерлерді импорттауға шектеулер енгізіледі. Оларды тек байланыс операторлары ғана әкеле алады. Бұл желіге кедергі келтіріп, байланыс сапасын төмендететін сертификатталмаған құрылғыларды пайдалануды болдырмауға мүмкіндік береді», – деді министр.
Сонымен қатар телекоммуникациялық инфрақұрылым салуға арналған жер телімдерін бөлу рәсімдерін жеңілдету ұсынылып отыр. Атап айтқанда, жобаларды егжей-тегжейлі жоспарлау және бас жоспарларға міндетті түрде енгізбей жүзеге асыру мүмкіндігі қарастырылған. Бұдан бөлек, ерекше қорғалатын табиғи аумақтарда байланыс желілерін дамыту мәселесі де қамтылған.
Түзетулердің екінші блогы телеком-инфрақұрылымды дамытуға және бәсекелестікті кеңейтуге бағытталған. Әңгіме виртуалды операторлардың жұмыс шарттарын жаңарту және спутниктік байланыс жүйелерін пайдалану туралы болып отыр. Жаслан Мәдиевтің айтуынша, бұл шалғай өңірлердегі интернет сапасын жақсартып, жаңа буындағы спутниктік технологияларды енгізуді жеделдетуге тиіс.
«Бұл жаңа буындағы спутниктік жүйелерді белсенді енгізуге, интернеті әлсіз аймақтарда қолжетімділікті арттыруға және спутниктік байланыс саласындағы бәсекені күшейтуге мүмкіндік береді», – деп түсіндірді министр.
Еске салайық, бұған дейін президент мемлекеттік сервистер базасында «көрінбейтін» операциялық жүйе құруды тапсырған болатын. Сондай-ақ 2025 жылдың қарашасында Мемлекет басшысы «Жасанды интеллект туралы» заңға қол қойған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
