- Басты бет
- Государство
- Қазақстанда жалған сақтандыру полистерін сату жиіледі: Агенттік ескерту жасады
Қазақстанда жалған сақтандыру полистерін сату жиіледі: Агенттік ескерту жасады
Агенттік азаматтарды сақтандыру шарттарын онлайн жасасу кезінде мұқият болуға шақырады
Қазақстанда интернет арқылы жалған сақтандыру полистерін сату деректері жиілеген. Бұл туралы Қазақстан Республикасының Қаржы нарығын реттеу және дамыту агенттігі ескертті, деп хабарлайды Kapital.kz іскерлік ақпарат орталығы.
Агенттік интернет-ресурстарды мониторингтеу барысында әлеуметтік желілер мен сайттарда өздерін сақтандыру ұйымдарының ресми парақшалары ретінде таныстырып, қызмет ұсынатын күмәнді ресурстарды анықтаған. Кейбір жағдайларда олар лицензияланған сақтандыру компанияларының атауларын пайдаланып, полистерді, соның ішінде көлік құралдары иелерінің азаматтық-құқықтық жауапкершілігін міндетті сақтандыруды онлайн рәсімдеуді ұсынады.
«Бұдан басқа, мұндай полистерді белгіленген тарифтерден жоғары бағамен сату жағдайлары анықталуда. Сонымен қатар, мұндай қызметтерді ұсынатын жеке тұлғаларда Агенттіктің сақтандыру (қайта сақтандыру) қызметін жүзеге асыруға лицензиясы жоқ екені және сақтандыру агенттері ретінде тіркелмегені анықталды», делінген ақпаратта.
«Сақтандыру қызметі туралы» заңға сәйкес, міндетті сақтандыру шарттары бойынша делдалдық қызмет көрсетуге жол берілмейді. Полистер тек лицензиясы бар сақтандыру ұйымдары арқылы рәсімделуі тиіс.
Осыған орай Агенттік азаматтарды сақтандыру шарттарын онлайн жасасу кезінде мұқият болуға шақырады.
«Тексерілмеген интернет-ресурстар арқылы сақтандыру шартын жасасу жарамсыз сақтандыру полисін сатып алуға және соның салдарынан сақтандыру қорғауының болмауына әкелуі мүмкін екенін еске саламыз», дее қосты агенттікте.
Ведомство азаматтарға сақтандыру компаниясының лицензиясын міндетті түрде тексеруді, полистерді тек ресми сайттар арқылы рәсімдеуді және үшінші тұлғалардың шоттарына ақша аудармауды ұсынады. Сондай-ақ жеке құжаттардың көшірмелерін бейтаныс адамдарға бермеу қажеттігін ескертеді.
Күдікті интернет-ресурстар анықталған жағдайда азаматтарға бұл туралы Агенттікке немесе құқық қорғау органдарына хабарлау ұсынылады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
