• Басты бет
• Государство
• Астанада Halyk Bank пен Beeline атынан фишинг таратқан топ қолға түсті

Астанада Halyk Bank пен Beeline атынан фишинг таратқан топ қолға түсті

Қаржылық мониторинг агенттігі жаппай SMS-фишинг таратқан топты ұстады

ТМД аумағында бұрын-соңды болмаған киберқылмыс әшкереленді. Астанадағы базарлардың маңында арнайы құрылғы орнатылған көлікпен жүріп, сағатына 100 мың адамға фишингтік SMS-хабарламалар таратқан топ құрықталды, деп хабарлайды Kapital.kz іскерлік ақпарат орталығы.

Қаржылық мониторинг агенттігі Бас прокуратура және «Tele2» ұялы байланыс операторының мамандарының қатысуымен фишингтік хабарламаларды жаппай таратумен айналысқан қылмыстық топтың қызметін тоқтатты.

Ведомство мәліметінше, қаскөйлер «SMS-бластер» деп аталатын құрылғыны қолданған.

«Бұл құрылғы ұялы байланыс операторларының базалық станцияларының жұмысын еліктіріп, шамамен 300 метр радиуста 4G сигналын таратады. Соның салдарынан жақын маңдағы мобильді құрылғылар мәжбүрлі түрде қорғанысы әлсіз 2G желісіне ауыстырылған», делінген ақпаратта.

Бұдан кейін абоненттердің телефондарына алдын ала дайындалған SMS-хабарламалар автоматты түрде жіберіліп отырған. Құрылғының мүмкіндігі байланыс операторларының сүзгі жүйелерін толық айналып өтіп, сағатына 100 мыңға дейін хабарлама таратуға жол берген. Сондай-ақ жабдық автокөліктерге орнатылып, қозғалыс кезінде, негізінен елорданың орталық базарлары маңында пайдаланылған.

Тергеу мәліметінше, хабарламалар «Beeline» және «Halyk Bank» атынан жіберіліп, жиналған бонустарды айырбастау ұсынылған.

«Сілтемеге өткен пайдаланушылар фишингтік сайттарға бағытталып, онда тауар таңдау ұсынылған. Кейін олардан телефон нөмірі, аты-жөні, банк картасының деректері, CVV-код және SMS арқылы растау сияқты жеке мәліметтер сұралған. Осылайша қаскөйлер азаматтардың құпия деректеріне және олардың банк қаражатына қол жеткізген», деп қосты ҚМА-да.

Аталған топ қылмыстық схеманы іске асырудың бастапқы кезеңінде анықталып, ұсталған. Қазір төрт күдікті ұсталып, қамауға алынды. Тергеу жалғасып жатыр.

Қаржылық мониторинг агенттігі қазақстандықтарды цифрлық қауіпсіздік талаптарын сақтауға шақырады: күмәнді сілтемелерге өтпеу, тексерілмеген сайттарға жеке және банк деректерін енгізбеу, сондай-ақ ақпаратты тек ресми көздер арқылы тексеру қажеттігін еске салады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз