• Басты бет
• Қаржы
• Үндістанда апатқа ұшыраған Boeing 787 ұшағы үшін қазақстандық сақтандыру компаниясы төлем жасады

Үндістанда апатқа ұшыраған Boeing 787 ұшағы үшін қазақстандық сақтандыру компаниясы төлем жасады

Қайта сақтандыру шарты «Еуразия» СК-мен жасалған

«Еуразия» сақтандыру компаниясы 2025 жылғы 12 маусымда Үндістанның Гуджарат штатында апатқа ұшыраған Air India әуе компаниясының Boeing 787 Dreamliner ұшағына қатысты қайта сақтандыру бағдарламасы аясында алғашқы төлемдерді жүзеге асырды. Ұшақ Ахмедабад – Лондон бағыты бойынша рейс орындаған.

Апатқа ұшыраған Boeing әуе кемесінің (фюзеляжы мен қозғалтқыштарын қоса алғанда) жалпы шығыны шамамен 120 млн долларды құрайды. «Еуразия» СК авиациялық тәуекелдерді қайта сақтандыру шарттары бойынша өз жауапкершілік үлесі шегінде алғашқы төлемді жүргізді. Қазіргі уақытта компания аталған сақтандыру оқиғасы бойынша шамамен 162 млн теңге көлемінде резерв қалыптастырған.

«Бұл трагедия Қазақстанда ерекше назар аудартты, себебі жуырда еліміз алғашқы Dreamliner ұшақтарын пайдалануға бермек. Апат болған алғашқы күннен бастап біз үндістандық әріптестерімізбен байланыстамыз. Әуе апаттарын тергеу – өте күрделі әрі ауқымды процесс, өйткені ол апат себептерін анықтауды және келтірілген шығынды, соның ішінде қаза тапқандардың туыстарына тиесілі өтемақыны бағалауды талап етеді. Біз қажетті құжаттардың толық пакетін алғаннан кейін төлемді жүзеге асырдық», – деді «Еуразия» СК басқарма төрағасының бірінші орынбасары Самат Қабдолов.

Сонымен қатар әуе тасымалдаушысының үшінші тұлғалар алдындағы жауапкершілігі де қайта сақтандырылған. Бұл – зардап шеккендерге, қаза тапқан жолаушылардың туыстарына және ұшақ құлаған кездегі кездейсоқ құрбандарға қатысты өтемақыларды қамтиды. 1999 жылғы халықаралық әуе тасымалдары ережелері туралы Монреаль конвенциясына сәйкес, Үндістан аумағында әрбір қаза тапқан адам үшін 128 821 SDRs (арнайы қарыз алу құқығы, шамамен 1,43 доллар) немесе шамамен 184 мың доллар көлемінде өтемақы белгіленген. Бұдан бөлек, конвенция жоғалған жүк үшін келтірілген шығынды да өтейді.

Еске салайық, Boeing 787-8 Dreamliner ұшағының бортында 230 жолаушы мен 12 экипаж мүшесі болған. Олардың ішінен бір ғана жолаушы аман қалған. Ұшақтың тұрғын аудандарға құлауы салдарынан жерде болған 19 адам қаза тауып, тағы 67 адам жарақат алды.

Бұл – Dreamliner әуе кемелері 2011 жылғы қазанда коммерциялық пайдалануға берілгеннен бергі алғашқы апат. VT-ANB тіркеу нөмірлі ұшақ Boeing 787 моделінің алғашқы әуе кемелерінің бірі болған және Air India әуе паркінің құрамына 2014 жылдың басында қосылған.

Қазіргі уақытта Үндістанның Азаматтық авиация жөніндегі бас дирекциясы апат себептерін тергеуді аяқтап жатыр. Нәтижелерді 2026 жылғы 12 маусымға дейін, яғни апаттың бір жылдығына дейін жариялау жоспарланып отыр.

«Еуразия» СК әлемдегі ірі әуе компанияларының халықаралық қайта сақтандыру бағдарламаларына, соның ішінде Үндістандағы жобаларға тұрақты түрде қатысады және бірнеше рет сақтандыру төлемдерін жүзеге асырған. Мәселен, 2020 жылы Air India Express әуе компаниясына тиесілі Boeing 737-700 ұшағының Кожикодедегі апатынан кейін қазақстандық компанияның жауапкершілік үлесі бойынша шамамен 50 млн теңге төленген болатын. 2006 жылдан бері «Еуразия» СК халықаралық авиациялық оқиғалар бойынша жалпы көлемі 6,1 млн доллар болатын төлем жасаған.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз