Ұлттық банк ипотека бойынша шекті мөлшерлемені 20% деңгейінде белгіледі
Өзгерістер 1 шілдеден бастап күшіне енеді
Ұлттық банк пен Қаржы нарығын реттеу және дамыту агенттігі ипотекалық несие бойынша шекті мөлшерлемені 25%-дан 20%-ға дейін төмендету туралы қаулы қабылдады, деп хабарлайды Kapital.kz іскерлік ақпарат орталығы.
Өзгеріс 2026 жылғы 1 шілдеден бастап күшіне енеді.
Кепілсіз банктік қарыздар бойынша ең жоғары мөлшерлеме бұрынғы деңгейде – 46% болып сақталды. Сондай-ақ кепілмен қамтамасыз етілген банктік қарыздар бойынша шекті мөлшерлеме де өзгерген жоқ, ол 35% деңгейінде қалды.
Еске сала кетейік, 2025 жылғы 9 маусымда ипотека бойынша шекті мөлшерлемені 25%-дан 20%-ға дейін төмендету туралы хабарланған болатын. Алайда 2025 жылғы 17 маусымда ҚНРДА мен Ұлттық банк ипотекалық несиелер бойынша ең жоғары мөлшерлемені 20%-бен шектеу нормасын 2025 жылғы 1 қарашаға дейін тоқтата тұру туралы бірлескен қаулы шығарды. 2025 жылғы қазанда бұл мерзім қайта шегеріліп, 2026 жылғы 1 шілдеге ауыстырылды.
Биыл сәуір айында ҚНРДА төрайымы Мәдина Әбілқасымова Қазақстанда ипотекалық несиелеу шарттарын қайта қарау жоспарланып отырғанын мәлімдеген еді. Оның айтуынша, мөлшерлеме бастапқы жарна көлеміне байланысты болады.
«Қазіргі уақытта Ұлттық банкпен бірлесіп кредиттер бойынша жылдық тиімді сыйақы мөлшерлемесінің шекті деңгейін белгілейтін қаулыға өзгерістер енгізу мәселесін қарастырып жатырмыз. Ипотекалық қарыздар бойынша жылдық тиімді мөлшерлемені бастапқы жарна көлемімен байланыстыру жоспарлануда. Яғни бастапқы жарна 30% және одан жоғары болған жағдайда мөлшерлеме 20% деңгейінде белгіленуі мүмкін. Ал бастапқы жарнасы 30%-дан төмен несиелер үшін мөлшерлеме жоғарырақ болады», – деген болатын реттеуші басшысы.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
