Қазақстанда былтыр электр энергиясын тұтыну 3,8%-ға өсті
KEGOC басшысы энергия жүйесіне түскен жүктемелер туралы айтып берді
«KEGOC» АҚ басқарма төрағасы Нәби Айтжанов Үкімет отырысында өткен күзгі-қысқы кезеңнің қорытындылары мен алдағы 2026-2027 жылдардағы күзгі-қысқы кезеңге (КҚК) дайындық туралы баяндады. Ол өткен күзгі-қысқы кезеңде Қазақстанның Біртұтас энергетикалық жүйесінің ең жоғары тұтыну көрсеткіші 2025 жылғы 18 желтоқсанда тіркеліп, 17 724 МВт-ты құрағанын хабарлады. Жүктеме максимумының 2024-2025 жылдардағы КҚК-мен салыстырғандағы өсімі 521 МВт-ты немесе 3%-ды құрады, деп хабарлайды Үкіметтің баспасөз қызметі.
2025 жылы электр энергиясын тұтыну 2024 жылмен салыстырғанда 4,6 млрд кВтсағ-қа немесе 3,8%-ға ұлғайып, 124,6 млрд кВтсағ-ты құрады. Былтыр электр энергиясын өндіру 5,2 млрд кВтсағ-қа немесе 4,4%-ға артып, 123,1 млрд кВтсағ болды.
Алдағы 2026-2027 жылдардағы КҚК-де тұтынудың ең жоғары деңгейі 18,2 ГВт деңгейінде күтіліп отыр. Алдағы күзгі-қысқы кезеңнен сәтті өту үшін блоктық станциялардың келесідей режимде жұмыс істеуі қажет: Екібастұз ГРЭС-1 – сегіз блок; Екібастұз ГРЭС-2 – екі блок; «ЕЭК» АҚ – жеті блок; Жамбыл ГРЭС – төрт блок.
Оның айтуынша: жоспарланған қуаттарды – Түркістан ПГУ, Қызылорда ПГУ, Алматы ЖЭО-2 және ЖЭО-3 ПГУ-лерін іске қосуды қамтамасыз ету; Жүйелік оператормен келісілген мерзімде негізгі генерациялаушы және электр желілік жабдықтардың барлық жоспарланған жөндеу жұмыстарын орындау; жылу электр станцияларында көмірдің нормативтік қорын, газ электр станциялары үшін газдың үздіксіз жеткізілуін қамтамасыз ету; Жамбыл ГРЭС-ін жеткілікті отын мөлшерімен және салқындатқыш сумен қамтамасыз ету мәселесін алдын ала шешу қажет.
Еске сала кетейік, 2025 жылы электр желілерінде 1,2 мың шақырым электр беру желісі мен 54 қосалқы станция жөнделді. Электр станциялары бойынша жөндеу жұмыстарын қаржыландыру 6%-ға артып, 348 млрд теңгеге дейін жетті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
