• Басты бет
• Государство
• «Қазцинктегі» жарылыс салдарынан екі жұмысшы қаза болды

«Қазцинктегі» жарылыс салдарынан екі жұмысшы қаза болды

Бес адам жарақат алғаны хабарланды

Өскемендегі «Қазцинк» зауытында болған жарылыс нәтижесінде екі адам көз жұмып, бес адам жарақат алды. Бұл туралы компанияның баспасөз қызметі Instagram парақшасында хабарлады.

«Бүгін таңертең Өскемен металлургиялық алаңында штаттан тыс жағдай тіркелді. Алдын ала мәлімет бойынша, түтін сорғышты тазалау жұмыстары кезінде жарылыс болып, соның салдарынан өрт тұтанып, конструкциялардың бір бөлігі қирады. Оқиға нәтижесінде екі адам қаза болып, бес адам жарақат алды. Зардап шеккендерге барлық қажетті медициналық көмек көрсетілуде. Оқиға орнында жедел қызметтер жұмыс істеп, салдарын жою шаралары жүргізілуде. Оқиғаның барлық мән-жайын жан-жақты және объективті тексеру үшін арнайы комиссия құрылды. Тергеу қорытындысы бойынша себептері анықталады. Компания қаза болғандардың туыстары мен жақындарына қайғырып көңіл айтады. Қаза болғандар мен зардап шеккендердің отбасыларына материалдық және психологиялық көмек көрсетіледі», – делінген хабарламада.

Компания уәкілетті органдар оқиғаның қоршаған ортаға әсерін бағалап жатқанын нақтылады. Алдын ала деректер бойынша, «шаңның жергілікті таралуы тіркелген, бірақ рұқсат етілген нормадан аспаған және қауіпті ластаушы заттар бөлінбеген».

Бұған дейін Өскемен металлургиялық алаңында іздестіру-құтқару жұмыстары мен конструкцияларды бөлшектеу жүргізіліп жатқаны хабарланған. Оқиға орнында құтқарушылар, кинологиялық топтар және медицина қызметкерлері жұмыс істеді. ТЖМ жанында жедел штаб құрылып, оған мемлекеттік органдар өкілдері кірді. Алғашында төрт адамның медициналық мекемеге жеткізілгені хабарланды. Кейін жарылыс салдарынан зардап шеккендер саны тоғыз адамға жеткені белгілі болды. Олардың екеуі ауыр жағдайда ауруханаға жатқызылып, тағы бір адам жансақтау бөлімінде жатыр. Премьер-министр Олжас Бектенов оқиғаның себептерін шұғыл анықтауды тапсырған еді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз