Комиссиялық дүкен кейпіндегі ломбард: Ақтөбе облысында тергеу аяқталды
Өңір тұрғындарына несие заңмен белгіленген шектен 12 есе жоғары мөлшерлемемен берілген
Ақтөбе облысында комиссиялық дүкендер кейпінде лицензиясыз ломбард қызметін ұйымдастыру дерегі бойынша тергеу аяқталды, деп хабарлайды Kapital.kz іскерлік ақпарат орталығы Қаржылық мониторинг агенттігінің баспасөз қызметіне сілтеме жасап.
«Қаржылық мониторинг агенттігінің Ақтөбе облысы бойынша департаменті ломбард саласындағы заңсыз кәсіпкерлік қызмет дерегі бойынша тергеуді аяқтады. Тергеу мәліметтеріне сәйкес, күдікті 2020 жылдан 2025 жылға дейін ломбард қызметін жүзеге асыруға қажетті міндетті лицензиясыз, халыққа техника (ұялы телефондар, теледидардар, ойын приставкалары, фотоаппараттар және т.б.) кепілімен қарыз беру жүйесін ұйымдастырған. Қызмет комиссиялық дүкендер кейпінде жүргізілген, бұл уәкілетті органдар тарапынан реттеуді айналып өтуге мүмкіндік берген», - деді ҚМА.
Ақпаратта көрсетілгендей, ақшаға мұқтаж азаматтардың тығырыққа тірелген жағдайын пайдалана отырып, ол күніне 3,7%-ға жететін жоғары пайыздық мөлшерлемелер белгілеген, бұл заңмен белгіленген 0,3% шегінен 12 есе жоғары.
«Мәселен, комиссия шарты бойынша 10 күн мерзімге 257 000 теңге сомасында қарыз ресімдеген клиент 51 400 теңге (күніне 2%) мөлшерінде сыйақы төлеуге мәжбүр болған, ал оның мөлшері 7 710 теңгеден (0,3%) аспауы тиіс еді», - деп мысал келтірді ведомствода.
Агенттік мәліметінше, қылмыстық табыс сомасы 93 млн теңгеден асқан. Сот санкциясымен күдіктінің үш автокөлігі мен пәтеріне шектеу қойылды. Оған қатысты ешқайда кетпеу және тиісті мінез-құлық туралы қолхат түріндегі бұлтартпау шарасы таңдалды. Қылмыстық іс сотқа жіберілді. ҚР Қылмыстық-процестік кодексінің 201-бабы тәртібіндегі өзге ақпарат жария етуге жатпайды.
«Заңсыз қаржылық құрылымдарға жүгіну мүлік пен ақшалай қаражатты жоғалту қаупімен байланысты екенін атап өту маңызды. Қаржылық мониторинг агенттігі мүлік кепілімен қарыз беретін ұйымдардың лицензиясының бар-жоғын тексеруді қатаң ұсынады, өйткені мұндай қызмет міндетті мемлекеттік реттеуге жатады», - деп үндеу тастады ҚМА қазақстандықтарға.
Бұған дейін «Актив Ломбард» иесі Сергей Койновқа қатысты тергеудің аяқталғаны белгілі болған еді. Ол да комиссиялық қызмет кейпінде жеке тұлғаларға микроқарыз беру схемасын ұйымдастырды деген күдікке ілінді. Оралдағы «комиссиялық» дүкен 2 мыңнан астам заңсыз қарыз берген. Заңсыз микроқаржы ұйымы жоғары мөлшерлемемен 47 мыңнан астам қарыз берген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
