Жыл басынан бері мемлекетке 40 млрд теңгенің активі қайтарылды
Арнайы мемлекеттік қор қаражаты есебінен 39 әлеуметтік нысан ашылды
Қазақстанда активтерді қайтару және оларды заңды экономикалық айналымға қосу бағытындағы жүйелі жұмыс жалғасып жатыр. Жыл басынан бері мемлекет меншігіне 40 млрд теңгенің активі өткізілді. Бұл туралы алқа мәжілісі барысында Бас прокурор Берік Асылов мәлімдеді, деп хабарлайды Kapital.kz іскерлік ақпарат орталығы.
«Биыл заңсыз жылыстатылған активтердің 40 млрд теңгесі қайтарылды (оның ішінде ақшалай қаражат – 37,7 млрд теңге, мүлік түрінде – 2,3 млрд теңге)», - деді Бас прокурор.
Оның келтірген мәліметі бойынша, Арнайы мемлекеттік қор қаражаты есебінен 39 әлеуметтік нысан ашылған: Ақтаудағы жедел медициналық жәрдем станциясы, Шымкенттегі білім алушыларға арналған жатақхана, Астанадағы Қажымұқан Мұңайтпасов атындағы футбол стадионы іске қосылып, Балқаш әуежайын жаңғырту жұмыстары жүргізілген, сондай-ақ басқа да жобалар жүзеге асқан.
Ведомство басшысы инвесторларды қорғау жөніндегі Президент тапсырмасының жіті қадағалауда екенін атап өтті.
«Мемлекет басшысының жарлығымен құрылған Инвесторлардың құқығын қорғау комитеті өз өкілеттіктерін жүзеге асыруға кірісті. Негізгі басымдық жай ғана салдармен күресуге емес, жүйелі әрі белсенді жұмыс форматына көшуге берілді: бұл мәселелердің туындау себептерін анықтау мен оларды жоюды көздейді. Қазіргі уақытта прокурорлардың сүйемелдеуімен 3 мыңнан астам инвестициялық жоба жүзеге асырылып жатыр. Бұл жобалар экономикалық өсімнің жаңа нүктелерін қалыптастыруға, салық базасын кеңейтуге, халықты жұмыспен қамту деңгейін арттыруға және әлеуметтік тұрақтылықты нығайтуға жол ашуы тиіс. Оларды жүзеге асыру аясында 600 мыңнан астам жұмыс орнын ашу жоспарланған», - деді Берік Асылов.
Еске сала кетсек, бұған дейін 2022 жылдан бері мемлекетке 1,13 трлн теңгенің активі қайтарылғаны хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
