• Басты бет
• Экономика
• Орынбор ГӨЗ-індегі жағдайға байланысты Қазақстан газ тапшылығын қалай жауып жатыр?

Орынбор ГӨЗ-індегі жағдайға байланысты Қазақстан газ тапшылығын қалай жауып жатыр?

Елдің газ инфрақұрылымы қалыпты режимде жұмыс істеп тұр – Энергетика министрлігі

Қазақстан газ жеткізу логистикасын қайта реттеп, Орынбор газ өңдеу зауытындағы (ГӨЗ) оқиғаға байланысты отынға деген сұранысты басқа көздерден өтеп жатыр. Бұл туралы «Интерфакс-Қазақстан» агенттігі Қазақстан Энергетика министрінің кеңесшісі әрі ресми өкілі Әсел Серікбаеваға сілтеме жасап хабарлады.

«Орынбордағы жағдай отандық тұтынушыларға тауарлық газ жеткізу тұрақтылығына әсер еткен жоқ. Диспетчерлік қызметтер логистиканы шұғыл түрде қайта реттеді, ал газ көлемін өзара алмастыру баламалы бағыттар арқылы жүзеге асырылуда», — делінген Әсел Серікбаеваның сәрсенбі күні таратқан мәлімдемесінде.

«Отын тапшылығы басқа көздерден үздіксіз толтырылып жатыр. Қазақстанның газ инфрақұрылымы қалыпты режимде жұмыс істеуде. Ішкі нарық энергия ресурстарымен толық қамтамасыз етілген, жағдай министрлік пен ұлттық оператордың тұрақты бақылауында», — деп толықтырды ол.

«Газпром» мен «ҚазМұнайГаз» 2002 жылдан бері «ҚазРосГаз» бірлескен кәсіпорны аясында ынтымақтасып келеді. Бұл кәсіпорын Қарашығанақ кен орнының газын сатып алу, оны Орынбор ГӨЗ-інде өңдеу және Қазақстан мен Ресей тұтынушыларына сату үшін қос тараптың тең үлесімен (50/50) құрылған.

Қарашығанақ кен орнынан газ сатып алу-сату жөніндегі ұзақ мерзімді келісімшартқа жоба операторы — Karachaganak Petroleum Operating BV мен «ҚазРосГаз» арасында 2007 жылы қол қойылып, 2015 жылы ол 2038 жылға дейін ұзартылған болатын (жылына 9 миллиард текше метрге дейінгі көлемде).

Қарашығанақ — әлемдегі ең ірі кен орындарының бірі. Оның мұнай қоры 1,2 миллиард тоннаны, ал газ қоры 1,35 триллион текше метрді құрайды.

Айта кетейік, бұқаралық ақпарат құралдарының хабарлауынша, 24 маусымда Орынбордағы газ өңдеу зауытына Украина тарапынан ұшқышсыз ұшу аппараттарымен (дронмен) шабуыл жасалған.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз