Ұлттық қор қаржысы мақсатсыз жұмсалған: ақша көшелерді абаттандыруға бөлінген
Ұлттық жинақтың игерілмей қалған 83 млрд теңгесі кері қайтарылмады
Ұлттық қор қаражатының мақсатсыз әрі тиімсіз жұмсалу фактілері туралы Жоғары аудиторлық палатаның төрағасы Әлихан Смайылов мәлімдеді. Бұл заңбұзушылықтар 2025 жылғы республикалық бюджеттің атқарылуын тексеру қорытындысы бойынша анықталды, деп хабарлайды Kapital.kz іскерлік ақпарат орталығының тілшісі.
Төрағаның айтуынша, ел үшін стратегиялық маңызы бар бағыттарға жұмсалуы тиіс қаржы кей жағдайларда жергілікті деңгейдегі жобаларға жұмсалған. Соның ішінде ол көшелер мен қоғамдық орындарды абаттандыруды, ауылдық клубтар салуды және көшелерді жарықтандыруды атап өтті.
«Ұлттық қор қаражаты стратегиялық әрі ауқымды міндеттерді шешудің орнына, жергілікті маңызы бар жобаларды — көшелер мен саябақтарды абаттандыруды, ауылдық клубтар құрылысын, көшелерді жарықтандыруды қаржыландыруға жұмсалған. Жобалардың басым бөлігіне жобалау-сметалық құжаттамасы әзірленбей, тіпті жер телімдері дайын болмаса да қаржы бөлінген», — деді Әлихан Смайылов Сенаттың жалпы отырысында.
Жоғары аудиторлық палатаның мәліметінше, мұндай немқұрайлылық бекітілген жоспарларды қайта қарауға мәжбүр еткен. Бюджеттің атқарылуы барысында жалпы құны 100 млрд теңгеден асатын 132 жоба бағдарламадан алынып тасталды немесе ауыстырылды.
Ведомство пайдаланылмай қалған қаражатты Ұлттық қорға қайтару мәселесіне ерекше тоқталды. Ережеге сәйкес, игерілмеген ақша қорға кері қайтарылуы тиіс, алайда іс жүзінде бұл талап толық орындалмай отыр.
«Шамамен 83 млрд теңге қорға қайтарылмаған», — деді Жоғары аудиторлық палата басшысы.
Қорытындылай келе, аудиторлар екі негізгі мәселені шегелеп көрсетті: Ұлттық қор қаражатының негізгі мақсатынан ауытқуы және игерілмеген ресурстарды басқарудағы қаржылық тәртіптің төмендігі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
