2025 жылы кірістің артқанына қарамастан, бюджетке 336 млрд теңге түспей қалды
Мади Такиевтің мәлімдеуінше, түсімдер 2024 жылмен салыстырғанда 1,8 триллион теңгеге көбейген
2025 жылы республикалық бюджеттің кірісі 2024 жылмен салыстырғанда 1,8 триллион теңгеге (өсім қарқыны — 113,2%) артқанымен, жоспарланған қазынаға 336 миллиард теңге түспей қалды. Бұл туралы Сенаттың жалпы отырысында Қаржы министрі Мәди Такиев мәлімдеді, деп хабарлайды Kapital.kz іскерлік ақпарат орталығының тілшісі.
Министрдің айтуынша, былтыр бюджет түсімдері 21,4 триллион теңге болып, жоспар 99%-ға орындалған. Салық түсімдері 2,2 триллион теңгеге (17,5%-ға) өскен. Соның ішінде корпоративтік табыс салығы — 880 миллиард теңгеге (24%-ға), ал қосылған құн салығы (ҚҚС) — 932,5 миллиард теңгеге (18%-ға) көбейді.
«Бұған қоса, камералдық бақылаудың тиімділігі артып, қазынаға 388 миллиард теңге өндірілген», деді ол Қаржы министрі.
Мәди Такиев 2025 жылдың қорытындысы бойынша Қазақстан экономикасы 6,5%-ға өскенін атап өтті. Көлік, құрылыс, тау-кен өнеркәсібі мен сауда салалары бұл өсімге негізгі серпін берген.
«Инфляция 12,3% деңгейінде қалыптасып, орташа айлық жалақы 442 мың теңге болды, ал жұмыссыздық 4,6%-дан асқан жоқ. Мемлекеттік қарыз да белгіленген шектен шықпай, ІЖӨ-нің 22,8%-ын (36,4 триллион теңге) құрады. Ұлттық қордың активтері жыл соңында 73,8 миллиард долларға жетсе, оның 63,9 миллиард доллары — валюталық қоржын», деді Мәди Такиев.
Еске сала кетейік, 2025 жылы Қазақстан бюджетінің тапшылығы 4,1 триллион теңгені құраған еді. Жоғары аудиторлық палатаның төрағасы Әлихан Смайылов ІЖӨ бойынша болжам 9 триллион теңгеге артығымен орындалғанына қарамастан, мемлекеттік бюджетке 335 миллиард теңге жетпей қалғанын хабарлады. Оның айтуынша, былтыр бюджеттің атқарылуы жаңа Бюджет кодексі аясында өтіп, бюджеттік бағдарлама әкімшілерінің дербестігі мен жауапкершілігі күшейтілген. Алайда жүргізілген аудит бұл институционалдық өзгерістердің цифрлық және басқару инфрақұрылымы тұрғысынан әлі де толық жетілдірілмегенін көрсетті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
