Олжас Бектенов жүк тасымалы жоспары орындалмаған ҚТЖ басшылығын сынға алды
Компания 23 млн тонна жүктің орнына тек 16 млн тонна ғана тасымалдаған
Үкімет отырысында теміржол транзиті саласындағы негізгі көрсеткіштердің орындалу барысы талқыланды. Премьер-министр Олжас Бектенов «Қазақстан темір жолы» басшылығына белгіленген тасымал көлемінен айтарлықтай артта қалғанын ескертіп, алға қойылған міндеттерді орындау үшін шұғыл шаралар қабылдауды талап етті, деп хабарлайды Kapital.kz іскерлік ақпарат орталығының тілшісі.
Үкімет басшысы ҚТЖ басқарма төрағасы Талғат Алдыбергеновке қаратып айтқан сөзінде компания елдің көлік-логистикалық әлеуетін арттыруда маңызы зор транзиттік жүк тасымалы бойынша жоспарланған нәтижелерге қол жеткізуі тиіс екенін атап өтті.
«Талғат Сағиұлы, сіздің алдыңызда 55 млн тонна көлемінде транзиттік тасымалды қамтамасыз ету міндеті тұр. Алайда, қолда бар мәліметтерге сүйенсек, бүгінгі таңда жоспарлы көрсеткіштерден артта қалу деңгейі 30%-ға жеткен», - деп қадап айтты Олжас Бектенов.
Премьер-министрдің айтуынша, ұлттық тасымалдаушының нақты нәтижелері әзірге белгіленген межеден әлдеқайда төмен. Мәселен, жыл басынан бері 23 млн тонна жүк тасымалдау жоспарланса, іс жүзінде тек 16 млн тоннасы жеткізілген. Бұл мақсатты деңгей мен ағымдағы көрсеткіш арасында үлкен алшақтық бар екенін көрсетеді. Үкімет басшысы алға қойылған мақсаттарға жету үшін басқару ісінде шұғыл шешімдер қабылдау және белгіленген іс-шаралардың орындалуын бақылауды күшейту қажеттігін баса айтты.
«Бекітілген көрсеткіштердің уақытылы орындалуын қамтамасыз етуді тапсырамын. Бұл — сіздің жеке жауапкершілігіңіз», - деп толықтырды Олжас Бектенов.
Еске сала кетейік, соңғы бес жылда Қазақстан аумағы арқылы өтетін транзиттік тасымал көлемі 20 млн тоннадан 33 млн тоннаға дейін өсті. Алдағы уақытта бұл көрсеткішті 2030 жылға қарай 67 млн тоннаға, ал 2040 жылға қарай 100 млн тоннаға дейін жеткізу жоспарланып отыр.
ҚТЖ екі жыл ішінде елдегі теміржолдардың төрттен бір бөлігін жаңғыртады. Сондай-ақ алдағы төрт жылда Қазақстанда 5 мың шақырым жаңа теміржол салынады. Бақты – Аягөз теміржолының құрылысын 2027 жылдың соңына дейін аяқтау көзделген. Желінің жалпы ұзындығы 303 шақырымды құрайды. Қытай бағытындағы бұл теміржол желісінің құрылысы Абай облысында 2023 жылы басталған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
