Қазақстанда локомотивтердің тозу деңгейі 49% дейін төмендеді
Көлік министрі теміржол паркін жаңарту және 124 вокзалды жаңғырту жұмыстары туралы есеп берді
Қазақстанда жаңа техника сатып алудың арқасында локомотивтердің тозу деңгейі 74 пайыздан 49 пайызға дейін азайып, олардың орташа пайдалану мерзімі 21 жылға дейін қысқарды. Көлік министрі Нұрлан Сауранбаевтың айтуынша, бұл жаңару тек жүк және жолаушылар тасымалы секторына ғана емес, инфрақұрылымға да қатысты. Қазіргі уақытта елде вокзалдарды жаңғыртудың ең ірі бағдарламасы іске асырылуда. Олардың алғашқы 30-ы осы жылдың 1 шілдесіне қарай пайдалануға беріледі, деп хабарлайды Kapital.kz іскерлік ақпарат орталығының тілшісі.
«2014-2019 жылдары локомотивтердің аз сатып алынуы тарту күші бар жылжымалы құрамның тапшылығына әкеп соқты. Соңғы жылдары локомотив паркін жаңартудың ауқымды бағдарламасы қолға алынды. 2028 жылға дейін отандық өндірістің жаңа локомотивтерін жеткізу жалғасады. Қазіргі уақытта локомотив паркі тасымал процесінің қажеттіліктерін толық өтеп отыр. Атқарылған жұмыстардың нәтижесінде локомотивтердің тозу деңгейі 74 пайыздан 49 пайызға төмендеді. Локомотивтердің орташа жасы 30-дан 21 жылға дейін жасарды. Олардың техникалық жағдайы жақсарып, дизель отынының шығыны 10 мың тонна-километрге 42 келіден 24 келіге дейін азайды. Wabtec компаниясының мәліметінше, КТЖ локомотивтері әлемнің 93 елінің теміржол әкімшіліктері арасында ең тиімді деп танылды», - деді Нұрлан Сауранбаев үкімет отырысында.
Жүк вагондарының паркінде шамамен 147 мың вагон бар, олардың басым бөлігі жеке операторларға тиесілі.
«Жолаушылар вагондарының паркін жаңарту жұмыстары да жалғасып жатыр. Соңғы жылдары 650-ден астам жолаушылар вагоны жаңартылды. 2030 жылға қарай парктердің жаңару деңгейін 90 пайызға жеткізу жоспарлануда», - деп атап өтті баяндамашы.
Еске сала кетейік, Қазақстанның жолаушылар тасымалы паркін жаңарту үшін көпмиллиардтық несие есебінен сатып алынатын швейцариялық Stadler компаниясының вагондары 2026 жылдың мамыр айында рейске шығуы тиіс болатын. Құрамдар пилоттық сынақтан өтіп үлгерді, алайда тексеріс барысында техникалық кемшіліктер анықталып, қазіргі уақытта олар өндірушімен бірлесіп жойылып жатыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
