Шымкентте инвесторға зауыт салу үшін жер телімін бермей қойған
Алкогольсіз сусындар шығаратын өндіріс орнын ашуға 750 млн теңге инвестиция салу жоспарланған
Шымкентте кәсіпкерге ауыз су мен алкогольсіз сусындар шығаратын зауыт құрылысы үшін жер телімін бөлуден негізсіз бас тартқан. Бұл туралы Kapital.kz іскерлік ақпарат орталығы қалалық прокуратураның баспасөз қызметіне сілтеме жасап хабарлайды.
«Шымкент қаласының прокуратурасы Инвесторлардың құқықтарын қорғау комитетімен бірлесе отырып, инвестициялық жобаны жүзеге асыру үшін жер телімін алып берді. «OxyLine» ЖШС ауыз су және алкогольсіз сусындар шығаратын зауыт салуды көздеп отыр. Жобаның жалпы құны 750 млн теңгені құрайды, сондай-ақ 30 жаңа жұмыс орны ашылмақ. Тексеріс барысында бұған дейін Өңірлік үйлестіру кеңесінің отырысында инвесторға жер телімін беруден бас тартылғаны белгілі болды. Қала прокуратурасы комиссияның бұл шешімді ешқандай уәжсіз, заңсыз қабылдағанын анықтады», - делінген қадағалау органының хабарламасында.
Жағдайды жедел реттеу үшін прокуратура қадағалау актісін енгізді. Нәтижесінде инвесторға «Бозарық» индустриялық аймағынан жер телімі бөлінді.
Қазіргі уақытта әкімшілік кедергілер толықтай жойылып, инвестор жобаны іске асыруға кірісті.
Бұған дейін «Қорғас-Шығыс қақпасы» АЭЗ-де 11 инвестордың құқығы бұзылғаны белгілі болған еді. Кәсіпкерлер мен инвесторлардың құқығын шектеу деректері QAZAQGAZ AIMAQ келісімшарттарынан да анықталды. Ал Алматыда 31 инвесторға негізсіз салық салынған. Мемлекеттік кірістер органдары олардың индустриялық аймақ аумағында жұмыс істейтінін ескермеген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
