Конституциялық сотқа жүгінген кезде мемлекеттік баж салығын төлеу қажет болмайды
Сенат Салық кодексіне енгізілетін түзетулерді мақұлдады
Сенаттың жалпы отырысында депутаттар «Қазақстан Республикасының Салық кодексіне өзгерістер мен толықтырулар енгізу туралы» заң жобасын қарап, екі оқылымда мақұлдады. Түзетулер салық заңнамасын жаңартылған Конституция ережелеріне сәйкес келтіруге және жекелеген құқықтық нормаларды жетілдіруге бағытталған, деп хабарлайды Kapital.kz іскерлік ақпарат орталығының тілшісі.
Құжатты таныстырған Сенат депутаты Бекбол Орынбеков Салық кодексі салық салу тәртібін, салық төлеушілер мен мемлекеттің құқықтары мен міндеттерін реттейтін елдің негізгі заңнамалық актілерінің бірі болып табылатынын еске салды.
«Салық кодексі салық түрлерін айқындайды, оларды кім, қанша және қандай мерзімде төлеуі тиіс екенін белгілейді, сондай-ақ тараптардың құқықтары мен міндеттерін бекітеді. Дәл сол себепті біз, бастамашы ретінде, осы заң жобасын енгіздік. Заң жобасы Қазақстан Республикасы Салық кодексінің нормаларын 2026 жылғы 15 наурызда республикалық референдумда қабылданған Қазақстан Республикасының Конституциясы ережелеріне сәйкес келтіру мақсатында әзірленді», — деді Бекбол Орынбеков.
Оның айтуынша, түзетулер пакеті бір палаталы парламент — Құрылтайдың жұмыс істеуіне, сондай-ақ Қазақстан Халық Кеңесінің құрылуына байланысты өзгерістерді қамтиды. Сонымен қатар, құжатта құқықтық терминологияны жетілдіруге және жекелеген нормалардың заңдық дәлдігін арттыруға бағытталған редакциялық түзетулер бар.
Бөлек блокпен әкімшілік-аумақтық бірліктерді көрсету тәртібіне қатысты өзгерістер қарастырылған. Түптеп келгенде, Астананың ерекше мәртебесін ескере отырып, аумақтар атауын жазудың басымдықты тәртібі белгіленеді.
Сондай-ақ заң жобасында Салық кодексінен Конституциялық сотқа жүгінгені үшін мемлекеттік баж салығын алу туралы норманы алып тастау көзделген. Бұл түзету «Қазақстан Республикасының Конституциялық Соты туралы» заңның 40-бабына бұған дейін қабылданған өзгерістерге байланысты енгізілуде.
Атап өтілгендей, заң жобасын қабылдау салық заңнамасының мемлекеттік құрылымның жаңартылған конституциялық моделімен үйлесімділігін қамтамасыз етуге және конституциялық реформа жүргізілгеннен кейін туындаған құқықтық коллизияларды жоюға мүмкіндік береді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
