• Басты бет
• Экономика
• Қазақстанда төртінші мұнай өңдеу зауыты: елде жаңа мұнай зауытының жобасын әзірлеу басталды

Қазақстанда төртінші мұнай өңдеу зауыты: елде жаңа мұнай зауытының жобасын әзірлеу басталды

Болашақ кешен жылына 10 млн тоннаға дейін мұнай өңдей алады

Қазақстанда төртінші мұнай өңдеу зауытын салу жобасы практикалық кезеңге өтті – қазір алдын ала техникалық-экономикалық негіздеме әзірленіп жатыр. Жаңа ірі кешен жылына 10 млн тоннаға дейін мұнай өңдей алады, деп хабарлайды Kapital.kz іскерлік ақпарат орталығының тілшісі энергетика министрлігінің баспасөз қызметіне сілтеме жасап.

Жобаның тапсырыс берушісі – Самұрық-Қазына қорының еншілес кәсіпорны SK Ondeu.

«Алты ай ішінде халықаралық инжинирингтік команда кешенді алдын ала жобалық зерттеулер жүргізеді, олардың нәтижесі бойынша Үкіметке болашақ зауыттың техникалық және экономикалық параметрлері ұсынылады. Мамандар бірнеше негізгі бағытты пысықтайды. Ең алдымен шикізатпен қамтамасыз етудің ең тиімді схемасы анықталады – Кашаған және Теңіз кен орындарынан мұнай өңдеу, сондай-ақ қолданыстағы құбыр инфрақұрылымы арқылы аралас шикізатты пайдалану нұсқалары қаралады.

Сонымен қатар мұнай өңдеу зауытын салатын орынды таңдау мәселесіне ерекше назар аударылады. Сарапшылар көлік логистикасын, теміржол инфрақұрылымына қолжетімділікті, өткізу нарықтарына жақындығын, экологиялық талаптарды және инженерлік коммуникациялардың болуын бағалайды», – деп атап өтті Ерлан Ақкенженов.

Ведомство басшысы Ерлан Ақкенженовтің айтуынша, жаңа кешен құрылысы Қазақстанның ұзақ мерзімді энергетикалық тәуелсіздігін қамтамасыз ету жолындағы прагматикалық әрі стратегиялық маңызды қадам болып табылады. Оның сөзінше, «жобаның орналасуы мен конфигурациясына қатысты барлық шешімдер тек экономикалық тиімділік пен техникалық есептеулер негізінде қабылданады».

Алдын ала жобалық құжаттама негізінде Үкімет жобаны жобалық құжаттама әзірлеу кезеңіне көшіру, халықаралық инвесторларды тарту және кейіннен құрылыс жұмыстарын бастау туралы шешім қабылдайды.

Еске салайық, Қазақстан Кувейтті төртінші мұнай өңдеу зауытын салуға қатысуға шақырған. 2026 жылдың ақпанында жоба құны шамамен 10 млрд доллар болуы мүмкін екені хабарланған.

Президент Үкіметтің кеңейтілген отырысында Қазақстанның отын-энергетика және мұнай-газ химиясы салаларындағы импортқа тәуелділігіне назар аударып, қолданыстағы мұнай өңдеу зауыттарын жаңғырту және жаңа жобаларды іске асыру қажеттігін атап өткен.

2025 жылдың шілдесінде Үкімет 2025-2040 жылдарға арналған мұнай өңдеу саласын дамыту тұжырымдамасын бекіткен.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз