• Басты бет
• Экономика
• Қазақстан Африка нарығына экспорттау үшін Момбаса портын пайдалану мәселесін қарастырып жатыр

Қазақстан Африка нарығына экспорттау үшін Момбаса портын пайдалану мәселесін қарастырып жатыр

Қасым-Жомарт Тоқаев пен Уильям Руто БАҚ өкілдері үшін брифинг өткізді.

Қасым-Жомарт Тоқаев пен Уильям Руто БАҚ өкілдері үшін брифинг өткізді, деп хабарлайды Kapital.kz іскерлік ақпарат орталығы Ақорданың баспасөз қызметіне сілтеме жасап.

Мемлекет басшысы Кения президентінің Қазақстанға жасаған алғашқы тарихи сапары екі ел арасындағы ынтымақтастықты жаңа деңгейге көтеретініне сенім білдірді.

«Кения – Қазақстанның Африка құрлығындағы ең ірі және сенімді сауда серіктесінің бірі. Біз екі елдің ықпалдастығын одан әрі бекемдей түсуге ниеттіміз. Кения Республикасы соңғы жылдары дамудың даңғыл жолына шықты. Шығыс Африканың жауһары саналатын бұл ел қаржы, ауыл шаруашылығы, көлік-логистика және басқа да салаларда елеулі жетістікке қол жеткізді. Найроби қаласы маңызды халықаралық дипломатия орталығы саналады. Мұнда Біріккен Ұлттар Ұйымының бірнеше құрылымы тиімді жұмыс істеп тұр. Жалпы алғанда, Кенияның әлемдік сахнадағы беделі артып келеді. Бұл президент Рутоның сарабдал саясаты мен көреген көшбасшылығының нәтижесі деп білеміз. Біз былтыр Найробиде өз елшілігімізді аштық. Бұл шешім Қазақстанның Кенияға шынайы ықыласы мен достығын аңғартады. Жалпы, бұл – Қазақстанның Африка құрлығындағы алтыншы дипломатиялық өкілдігі. Еліміз Африка мемлекеттерімен байланысын бекемдеуге баса мән береді», – деді Қазақстан президенті.

Қасым-Жомарт Тоқаевтың айтуынша, тараптар бірқатар маңызды мәселелер бойынша мазмұнды келіссөздер жүргізді.

«Әсіресе, сауда-экономикалық ықпалдастықты кеңейтуге назар аудардық. Көлік, ауыл шаруашылығы, ақпараттық технологиялар, туризм, өнеркәсіп және басқа да салада бірлескен жобаларды іске асыруға уағдаластық. Елдеріміздің арасында тұрақты түрде тікелей әуе рейстерін ашу мүмкіндігі туралы да пікір алмастық. Біз ауыл шаруашылығы өнімдерін, ең алдымен, бидайды және өзге де тауарларды Африка нарығына жеткізуге мүдделіміз. Осы мақсатпен Момбаса портын пайдалану мәселесін қарастырдық. Бұл – осы аймақтың сегіз мемлекетіне жол ашатын Шығыс Африкадағы ең ірі логистика орталығының бірі. Бүгінде Қазақстан нарығында Кенияның бірқатар тауары, соның ішінде шай және кофе өнімдері бар. Мұны екі ел арасында орныққан тұрақты сауда қатынасының көрінісі деуге болады. Сонымен қатар біз Кения өнімдерін Қазақстан арқылы Еуразия елдеріне жеткізу мәселесін талқыладық. Сауда-экономикалық ықпалдастықты жаңа деңгейге көтеру қажет екенін айттық. Қазақстан-Кения Іскерлік кеңесін құру туралы бастама көтердік. Бұл кеңес нақты жобаларды ілгерілетуге, өзара алыс-берісті арттыруға мүмкіндік береді», – деді мемлекет басшысы.

Қасым-Жомарт Тоқаевтың айтуынша, Кения Қазақстанның eGov жүйесіндегі жетістіктеріне, сондай-ақ ғарыш және ақпараттық технологиялар салаларындағы тәжірибесіне қызығушылық танытып отыр.

«Сапар барысында президент Руто Alem.ai орталығының және Қазақстанның Ұлттық ғарыш орталығының жұмысымен танысады. Келіссөздер аясында мәдениет, туризм, білім және ғылым салаларындағы ынтымақтастыққа да ерекше назар аударылды. Кения экологияны қорғау мен биоалуантүрлілікті сақтауға үлкен мән береді. Бұл ұстаным біздің «Таза Қазақстан» идеологиясымен сәйкес келеді. Сонымен қатар, бүгін Астанада қазақ-кения бизнес-форумы өтіп жатыр, оған екі елдің бизнес өкілдері қатысуда. Бұл шара мемлекеттер арасындағы байланысты одан әрі тереңдетуге жаңа серпін береді. Біз үкіметтерге көпқырлы серіктестікті кеңейту үшін нақты шаралар қабылдауды тапсырдық», – деді Қасым-Жомарт Тоқаев.

Қасым-Жомарт Тоқаев пен Уильям Руто келіссөздер барысында халықаралық күн тәртібіне қатысты пікір алмасты.

«Африка құрлығындағы және Таяу Шығыстағы ахуалды талқыладық. Найроби аймақтық қақтығыстарды реттеуді көздейтін бітімгерлік бастамаларға белсенді қолдау көрсетуде. Сондай-ақ Кения Африкадағы бейбітшілік пен тұрақтылықты нығайту үшін жүйелі жұмыс жүргізіп келеді. Біз мұны жоғары бағалаймыз. Әлемдегі көптеген түйткілге қатысты Қазақстан мен Кенияның ұстанымдары – ұқсас. Екі ел де халықаралық мәселелерді тек бейбіт, дипломатиялық жолмен, яғни, келіссөздер арқылы шешу керек деп есептейді. Біз Біріккен Ұлттар Ұйымы және басқа да халықаралық құрылымдар аясындағы ықпалдастығымызды күшейтуге келістік. Жалпы, бүгінгі келіссөздер нәтижелі әрі мазмұнды болды деуге толық негіз бар. Біз Қазақстан мен Кения арасындағы байланысты нығайтуға, өзара тиімді серіктестікті кеңейтуге және түрлі саладағы нақты жобаларды бірлесіп жүзеге асыруға дайынбыз. Бұл екі елдің де мүддесіне сай келеді», – деді мемлекет басшысы.

Уильям Руто бүгін өткен келіссөздер кең ауқымды салалар бойынша ынтымақтастықты тереңдетуге бағытталған сындарлы әрі нәтижелі болғанын атап өтті.

«Біз екіжақты қарым-қатынастың қазіргі жай-күйін қарастырып, сауда, инвестиция, инновация және өңірлік өзара ықпалдастық бағыттарындағы нақты шараларды іске асыру жайында уағдаластық. Кения Қазақстанды маңызды стратегиялық серіктес және Орталық Азияға, тұтас Еуразия аймағына негізгі қақпа санайды. Біз Қазақстанның Шығыс және Орталық Африка елдерімен байланысына дәнекер болуға дайынбыз. Қазақстан тарапына Найроби қаласында құрлықтағы қызметін ұйымдастырудың стратегиялық базасын жасақтауды, ал Момбаса және Ламу порттарын өңірлік нарыққа шығу үшін негізгі логистикалық хаб ретінде қарастыруды ұсындық», – деді Уильям Руто.

Бұған дейін Қасым-Жомарт Тоқаев пен Уильям Руто келіссөздер қорытындысы бойынша бірлескен мәлімдеме қабылдады. Екі ел көшбасшыларының қатысуымен ресми делегациялар бірқатар құжаттармен алмасты.

Еске салайық, Кения президенті Уильям Руто Қазақстанға мемлекеттік сапармен келді. Тәуелсіздік сарайында Кения президентін ресми қарсы алу рәсімі өтті. Одан кейін Қазақстан президенті мен Кения президенті шағын құрамда келіссөздер жүргізді. Қасым-Жомарт Тоқаев Астанаға келгені және өзімен бірге ірі бизнес делегациясын алып келгені үшін Уильям Рутоға алғыс білдірді. Кеңейтілген құрамдағы келіссөздер барысында Қазақстан басшысы Кениямен Іскерлік кеңес құруды ұсынды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз