• Басты бет
• Экономика
• Қазақстан, Түркия, Әзербайжан және Қырғызстан жүк тасымалына арналған цифрлық бланкілерге көшті

Қазақстан, Түркия, Әзербайжан және Қырғызстан жүк тасымалына арналған цифрлық бланкілерге көшті

Көлік министрлігі рұқсаттарды делдалдар арқылы сатып алу автоматты түрде бұғаттауға әкелетінін ескертті

Қазақстан Әзербайжан, Түркия және Қырғызстанмен жүк тасымалына арналған электронды рұқсат бланкілеріне көшті. Бұл көлік компанияларының жұмысын жеңілдетіп, халықаралық тасымалдарды жеделдетуге мүмкіндік береді, деп хабарлайды Kapital.kz іскерлік ақпарат орталығының тілшісі көлік министрлігінің баспасөз қызметіне сілтеме жасап.

«Электронды форматқа көшу қағаз бланкілерден бас тартуға және әкімшілік кедергілерді барынша азайтуға мүмкіндік береді. Енді рұқсаттарды рәсімдеу және пайдалану тараптардың интеграцияланған ақпараттық жүйелері арқылы цифрлық форматта жүзеге асырылады. Мемлекеттік қызметті алу elicense.kz порталындағы «Көлік» бөлімінде қолжетімді. Электронды рұқсат алу үшін автокөлік құралы Қазақстан Республикасында тіркелуі және халықаралық автожүк тасымалдарын жүзеге асыруға рұқсаты болуы тиіс», – деп түсіндірді министрлікте.

Бұған дейін Қытай мен Өзбекстанның шетелдік рұқсат бланкілерін цифрландыру жұмыстары жүргізілген болатын.

«Электронды форматқа көшуге байланысты министрлік рұқсат бланкілерін үшінші тұлғалар арқылы сатып алуға жол берілмейтінін ескертеді. Берілген электронды рұқсаттар туралы барлық мәліметтер, соның ішінде тасымалдаушы мен көлік құралы туралы деректер автоматты режимде Әзербайжан, Түркия және Қырғызстанның ақпараттық жүйелеріне жіберіледі. Егер талаптарды бұза отырып рәсімделген рұқсат пайдаланылса, деректердің сәйкессіздігі анықталады. Бұл аталған мемлекеттердің аумағына кіруден бас тартуға, сондай-ақ өзге де жауапкершілік шараларына әкелуі мүмкін. Министрлік тасымалдаушыларды рұқсаттарды тек ресми мемлекеттік сервистер арқылы алуға және белгіленген тәртіпті қатаң сақтауға шақырады», – деп ескертті ведомствода.

Еске салайық, қазақстандық тасымалдаушылар халықаралық жүк тасымалдарын 42 мемлекетпен жасалған үкіметаралық келісімдер негізінде жүзеге асырады. 2025 жылы 506 мың рұқсат бланкісі алмасылды, ал 2026 жылға 40 елмен 150 мың бірлік көлеміндегі алдын ала квота келісілді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз