Степногорск пен Көкшетаудағы жылу желілерін жөндеуге 3,9 млрд теңге бөлінді
Қаржы үкімет резервінен бағытталды
Мемлекет басшысының жылу-энергетикалық инфрақұрылымды жаңғырту жөніндегі тапсырмаларын орындау аясында Қазақстан үкіметінің резервінен Ақмола облысындағы екі қала – Степногорск пен Көкшетауда инженерлік желілер мен жылу көздерінің тозуын азайтуға 3,9 млрд теңгеден астам қаржы бөлінді. Тиісті қаулыға премьер-министр Олжас Бектенов қол қойды, деп хабарлайды Primeminister.kz.
Қаражаттың негізгі бөлігі – шамамен 2,7 млрд теңге Степногорск қаласындағы ұзындығы 7,5 шақырым болатын магистральдық жылу желісін жөндеу жобасын аяқтауға бағытталады. Ал Көкшетаудағы №1 және №2 қазандықтардың энергетикалық қазандықтарын, жабдықтары мен жүйелерін қалпына келтіруге 1,2 млрд теңге қарастырылған.
Қазіргі таңда Көкшетау қаласын жылумен екі қазандық қамтамасыз етеді, негізгі жылу көзі ретінде РК-2 қазандығы саналады. Былтыр үкімет резервінен бөлінген қаражат есебінен қалада кешенді техникалық жұмыстар жүргізіліп, нәтижесінде жабдықтардың тозу деңгейі 44%-дан 42%-ға дейін төмендеді. Қаланың жылу желілерінің жалпы ұзындығы 188,7 шақырымды құрайды.
Степногорскіде де үкімет резерві есебінен 7,1 шақырым магистральдық жылу желілері жаңартылып, тозу деңгейі 71,4%-дан 68%-ға дейін қысқарған.
Аталған шараларды іске асыру өңір тұрғындарын жылумен қамту сенімділігін арттыруға, желілердегі апат санын азайтуға және алдағы жылыту маусымдарын тұрақты өткізуге мүмкіндік береді.
Жалпы ел бойынша үкімет қабылдаған шаралардың нәтижесінде 2025 жылы 10 энергия блогына, 63 қазандыққа және 39 турбинаға күрделі жөндеу жүргізілді. Сонымен қатар 323 шақырым жылу желісі қайта жаңартылып немесе ауыстырылды, 17 мың шақырым электр беру желісі мен 420 қосалқы станция жөнделді.
Бұл жұмыстар электр станциялары жабдықтарының тозуын 53%-ға, жылу желілерінің тозуын 50%-ға дейін төмендетуге мүмкіндік берді. Сондай-ақ электр станцияларындағы технологиялық бұзушылықтар саны 15%-ға азайды. Бұдан бөлек, сегіз ЖЭО тәуекел аймақтарынан шығарылды: бесеуі «қызыл» аймақтан «сарыға», тағы үшеуі «сарыдан» «жасыл» аймаққа өтті. Жаңғырту бойынша жеке жоспарлар бекітіліп, жөндеу жұмыстарына бөлінетін қаржы көлемі ұлғайтылды.
Еске салсақ, үкімет Талдықорғандағы жылумен қамту нысандарының құрылысын аяқтауға шамамен 5,7 млрд теңге бөлген болатын. Сондай-ақ Риддердегі жылу желілері мен ЖЭО-ны жөндеуге 1,8 млрд теңге бағытталды. Теміртауда 2028 жылдың соңына дейін 200 шақырымнан астам жылу желісін жаңарту жоспарланып отыр.
Премьер-министр жылумен қамту нысандарындағы жөндеу жұмыстарын тамыз айының соңына дейін аяқтауды тапсырған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
