Семейде тұрғын үй құрылысына Қытай инвесторларын тарту жоспарлануда
Huocheng County Weiye Real Estate «ақылды» технологияларды қолдана отырып үй салуға дайын
Абай облысының әкімі Берік Уәли мен «Huocheng County Weiye Real Estate Development Co Ltd» компаниясының бас директоры Инь Цзяньхуа Семейдің жаңа шағынаудандарында тұрғын үй салу мәселелерін талқылады, деп хабарлайды Kapital.kz іскерлік ақпарат орталығының тілшісі өңір әкімдігінің баспасөз қызметіне сілтеме жасап.
Қазіргі таңда облыста 32 мыңнан астам отбасы баспана кезегінде тұр. Оның ішінде 22 мыңнан астамы Семей қаласында тіркелген. Шамамен 5 мыңы – әлеуметтік осал топ өкілдері, 2 мыңнан астамы – көпбалалы отбасылар және 2 мыңға жуығы – жетім балалар. «Отбасы банк» өңірлік филиалында жалпы жинақ сомасы 44 млрд теңгені құрайтын 90 мыңға жуық салымшы бар. Сонымен қатар Семейге облыс орталығы мәртебесі берілгеннен бері қала халқы 7 мың адамға артқан.
Өңір басшысы құрылыс саласын дамытудың негізгі басымдықтарының бірі – сапалы әрі қауіпсіз инфрақұрылым қалыптастыру екенін атап өтіп, тұрғын үй құрылысы саласында шетелдік инвесторлармен бірлескен жобаларды іске асыруға қызығушылық білдірді. Өз кезегінде шетелдік компания өкілдері Семейде тұрғын үй жобаларын жүзеге асыруға дайын екендерін жеткізді.
«Семейдің қарқынды дамып келе жатқан қала екенін көріп отырмыз. Заманауи және сапалы тұрғын үйлерді «ақылды» технологияларды қолдана отырып салуға дайынбыз. Қажетті құжаттар болған жағдайда жұмысты бастауға әзірміз», – деді Инь Цзяньхуа.
Облыс әкімі салалық басқармалар мен Семей қаласының әкімдігіне инвесторларға қажетті қолдау көрсетуді тапсырды.
«Семейде заманауи тұрғын үйлер салу – өзекті міндет. Абай облысы қытайлық инвесторлармен ынтымақтастықты одан әрі нығайтуға және жан-жақты қолдау көрсетуге дайын. Сапарларыңыз үшін алғыс айтамын. Біз ұзақмерзімді әрі өзара тиімді әріптестікті дамытуға ашықпыз», – деді Берік Уәли.
«Huocheng County Weiye Real Estate Development Co Ltd» компаниясы Қытайда құрылыс және жылжымайтын мүлік саласында 2000 жылдан бері жұмыс істейді.
Еске салайық, үкімет Абай облысындағы жылу желілерін жөндеуге резервтен 2,5 млрд теңге бөлді. Қаражат алдағы жылыту маусымын тұрақты өткізу үшін Семейдегі жылумен жабдықтау нысандарын жөндеуге бағытталады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
