Шымкент мұнай өңдеу зауытында жоспарлы-алдын алу жұмыстары аяқталды
Зауытта терең өңдеу өндірісі 2 мамырда іске қосылды
Шымкент мұнай өңдеу зауытында жоспарлы-алдын алу жұмыстары (ЖАЖ) аяқталды, деп хабарлайды Kapital.kz іскерлік ақпарат орталығы «ҚазМұнайГаз» ҰК АҚ баспасөз қызметіне сілтеме жасап.
«Кәсіпорын ЖАЖ-ды ҚР Энергетика министрлігі бекіткен кестеде қарастырылған мерзімнен үш күн бұрын аяқтады. Мұнайды бастапқы өңдеу өндірісі 22 сәуірде жұмыс режиміне шықты, ал терең өңдеу өндірісі — 2 мамырда. ЖАЖ барысында 573-тен астам жабдық бірлігі мен 170 құбыр желісіне куәландыру жүргізілді, сондай-ақ ЭЛОУ-АТ, дизель отынын гидротазарту және каталитикалық крекинг қондырғыларын қоса алғанда, негізгі пештер мен агрегаттарға күрделі жөндеу жұмыстары жүргізілді», - делінген хабарламада.
Жұмыстарға 2000-нан астам маман мен 222 арнайы техника бірлігі жұмылдырылды. Бұл ретте еңбекті қорғау мен өнеркәсіптік қауіпсіздікке ерекше назар аударылды.
Алдын ала қалыптастырылған резервтердің арқасында ЖАЖ жүргізудің бүкіл кезеңі бойы кәсіпорын мұнай өнімдерін тұрақты жеткізуді қамтамасыз етіп, жанар-жағармай нарығының тұрақтылығын сақтап қалды, деп атап өтті ҚМГ.
Ұлттық компания атап өткендей, қазіргі ЖАЖ Шымкент мұнай өңдеу зауыты үшін маңызды кезең болды. Зауыт ұзартылған жөндеуаралық кезеңге көшті.
Келесі ауқымды жұмыстар 2030 жылға жоспарланған. 2028 жылы жекелеген қондырғыларға қысқа мерзімді ағымдағы жөндеу жүргізу қарастырылған. Тұтастай алғанда, бұл кәсіпорынға ұзақ тоқтаусыз жұмыс істеуге мүмкіндік береді, ішкі нарықты мұнай өнімдерінің тұрақты шығарылымымен қамтамасыз етеді, деп түйіндеді «ҚазМұнайГазда».
Мұнай өңдеу зауытындағы жоспарлы-алдын алу жұмыстары «Азаматтық қорғау туралы» Заңның талаптарына сәйкес жүргізіледі. Бұл жұмыстар зауыттың үздіксіз және қауіпсіз қызметін, сондай-ақ экологиялық стандарттардың сақталуын қамтамасыз етеді.
ШМӨЗ-дегі жөндеу жұмыстары осы жылдың 27 наурызында басталды. Кәсіпорындағы бұған дейінгі ЖАЖ 2024 жылдың көктемінде жүргізілген болатын.
Бұған дейін Қазақстанда үш мұнай өңдеу зауытын кеңейту аясында мұнай өңдеу көлемін жылына 18-ден 39 млн тоннаға дейін ұлғайту жоспарланғаны хабарланған еді.
Шымкент мұнай өңдеу зауыты — «ПетроКазахстан Ойл Продактс» ЖШС — 1985 жылы салынған. Бүгінгі таңда ШМӨЗ-дің 50 пайыздық иелік үлесі «НК «ҚазМунайГаз» АҚ-на тиесілі, дәл сондай үлесті қытайлық CNPC бақылайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
