Қазақстан Тәжікстанға астық экспортын 1,3 млн тоннаға жеткізбек
Қазақстандық компаниялар Душанбеге шақырту алды
«Азық-түлік келісімшарт корпорациясы» Тәжікстанға азық-түлік жеткізу көлемін арттыруға дайын. Бұл туралы Азық-түлік келісімшарт корпорациясы мен Тәжікстан Республикасы Үкіметі жанындағы Мемлекеттік материалдық резервтер агенттігі өкілдерінің кездесуінде айтылды, тараптар азық-түлік жеткізу саласындағы ынтымақтастықты нығайтуға уағдаласты, деп хабарлайды Kapital.kz іскерлік ақпарат орталығы.
Астанада өткен кездесуде Қазақстанның Тәжікстанға дәстүрлі бидай мен ұнның негізгі жеткізушісі екені айтылды. Бұл елде ішкі өндіріс қажеттіліктің 40%-ын ғана қамтиды. Ауыл шаруашылығы министрлігінің мәліметінше, былтыр қазақстандық бидай тасымалы 1,2 млн тоннаға жетті, бұл соңғы бес жылдағы рекордтық көрсеткіш деуге болады.
Тәжікстанның Мемлекеттік материалдық резервтер агенттігінің директоры Нурмахмад Ахмадзоданың айтуынша, ағымдағы маусымда 1,3 млн тоннаға дейін астық өнімдерін импорттауды жоспарлап отыр.
«Біздің ынтымақтастығымыздың болашағы зор, өйткені азық-түлік қауіпсіздігі кез келген мемлекет үшін әрқашан алдыңғы орында тұрады. Біз тек астық қана емес, сонымен қатар ұн мен күнбағыс майын жеткізуге де мүдделіміз», — деді Нурмахмад Ахмадзода.
Сондай-ақ корпорация өкілдерін Душанбе қаласында астық сақтау инфрақұрылымымен танысуға және жаңа элеваторлар мен қайта өңдеу кәсіпорындарын салуға қатысу мүмкіндігін қарастыруға шақырды.
«Азық-түлік келісімшарт корпорациясы» акционерлік қоғамы басқарма төрағасының бірінші орынбасары Ильдар Исмагулов ынтымақтастықты кеңейтуге дайын екенін жеткізді.
«Корпорация аталған агенттікпен ұқсас азық-түлік қауіпсіздігін қамтамасыз етуге бағытталған стратегиялық қызметтерді жүзеге асырады. Біздің серіктестігіміз уақыт сынынан өткен және өзара сенім мен ортақ міндеттерге негізделген. Біз өз тарапымыздан жеткізудің қолайлы тетіктерін ұсынып, Тәжікстанға астық пен тиісті азық-түлік қажеттілігін қамтамасыз етуге дайынбыз», — деді компания өкілі.
Кездесу қорытындысында қос тарап ұзақ мерзімді ынтымақтастықты қолдай отырып, алдағы уақытта астық жеткізу бойынша келісімшартқа қол қою мәселесін тағы бір мәрте талқылайтынын жеткізді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
