Қазақстанда инфляция алты ай қатарынан төмендеп келеді

Қазақстанда инфляцияны бәсеңдету үрдісі жалғасып отыр. Ресми деректерге сәйкес, 2026 жылғы наурызда айлық инфляция 0,6%-ды құрады. Бұған дейін қаңтар-ақпан айларында бұл көрсеткіш 1,0–1,1% деңгейінде болған, деп хабарлайды Kapital.kz іскерлік ақпарат орталығы.

Жалпы, инфляция соңғы алты ай бойы біртіндеп төмендеп келеді. 2025 жылдың қыркүйегінде 12,9%-ға жеткен жылдық көрсеткіш 2026 жылдың наурыз айының қорытындысы бойынша 11,0%-ға дейін баяулаған.

Үкімет қысқа мерзімді баға өсіміне әсер еткен қосылған құн салығының (ҚҚС) өзгерістерінің ықпалы қазір толық теңестірілгенін атап өтеді. Бұл фактор қазіргі инфляция қарқынына айтарлықтай қысым түсірмей отыр.

Ұлттық экономика министрлігінің болжамынша, инфляция 2027 жылдың басына қарай бір мәнді деңгейге дейін төмендеуі мүмкін.

Сонымен қатар елдің мемлекеттік қаржы көрсеткіштері де оң динамиканы көрсетуде. 2026 жылдың I тоқсанының қорытындысы бойынша мемлекеттік бюджет кірістері 104,4%-ға орындалды.

Атап айтқанда, жоспарланған 6,2 трлн теңгенің орнына бюджетке 6,4 трлн теңге түсті. Бұл жоспардан 268,7 млрд теңгеге артық. Ал өткен жылдың сәйкес кезеңімен салыстырғанда өсім 930,6 млрд теңгені немесе 16,9%-ды құрады.

Республикалық және жергілікті бюджеттердің де кірістері жоспарлы деңгейден жоғары қалыптасты. Өсім негізінен экспорттық тауарлар бағасының қолайлы болуы, тауарлар мен қызметтерді өткізу көлемінің артуы, сондай-ақ салықтық және кедендік әкімшілендірудің жақсаруы есебінен қамтамасыз етілді.