Қазақстан «Лукойлдың» үлесін сатып алудың әртүрлі нұсқаларын қарастыруда

Қазақстан ел аумағындағы «Лукойл» активтерін сатып алуға заңнамалық құқыққа ие, алайда әзірге компаниямен тікелей келіссөздер жүргізілген жоқ. Бұл туралы мәжілісте энергетика министрі Ерлан Аккенженов мәлімдеді, деп хабарлайды Kapital.kz іскерлік ақпарат орталығының тілшісі.

«Алайда өткен жылдың соңында мен Қазақстанда «Лукойлдың» активтері сатылатын жағдайда, заңнамада көзделген осы үлесті сатып алуға басымдық құқығымыз бар екенін айтқан болатынмын. Осыған байланысты Энергетика министрлігі OFAC-қа тиісті өтініш-хат жолдады», – деді ол.

Ерлан Аккенженов сатып алу нысандары әртүрлі болуы мүмкін екенін және олардың міндетті түрде біржолғы төлемді қамтымайтынын нақтылады.

«Бұл акциялар пакетін сатып алудың түрлі нысандары бар, соның ішінде кейінге қалдырылған төлем немесе шикізат сатуынан түсетін табыс есебінен жүзеге асыру сияқты тәсілдер де болуы мүмкін. Нұсқалар өте көп, біз олардың барлығын қарастырып жатырмыз», – деп қосты министр.

Бұған дейін, 2025 жылғы 15 желтоқсанда, ол «Лукойлдың» активтерін ықтимал сату туралы шешім қабылдау мерзімі барлық қажетті келісімдерді аяқтау және мүмкін болатын мәмілеге дайындық үшін қаңтардың ортасына дейін ұзартылғанын атап өткен болатын.

Айта кетейік, ресейлік «Лукойлға» «Қаламқас-Хазар» жобасындағы қатысу үлесінің 50%-ы тиесілі. 2025 жылғы қазанда Қазақстанның Энергетика министрлігі «Қаламқас-Хазар» жобасы бойынша одан әрі әріптестік пен оны іске асыру мәселесі қазақстандық мұнай компаниясы «ҚазМұнайГаз» (ҚМГ) бен санкцияға іліккен ресейлік «Лукойл» арасында санкциялар шарттарына сәйкес бірлесіп шешілетінін мәлімдеген еді.

АҚШ-тың OFAC ұйымы «Лукойл» мен «Роснефть»-ті санкциялық тізімге енгізіп, қызметін тоқтатуға 21 қарашаға дейінгі мерзімге лицензия берді. Ұлыбританияның санкциялық тізіміне «Лукойл» 15 қазанда енгізілді, алайда «Лукойл» мен «Роснефть» қатысатын Әзербайжан мен Қазақстандағы халықаралық жобалар бірден санкциялардан 2027 жылғы 14 қазанға дейін босатылды. Атап айтқанда, бұл КҚК, «Теңізшевройл», «Шах-Дениз», «Оңтүстік Кавказ газ құбыры», «Әзербайжан газ жеткізу компаниясы» және Қарашығанақ жобалары.