«Alatau City» девелопері АХХО-да жаңа компания тіркеді
Юрий Цхай АХХО-да жаңа компания құрды
Caspian Group негізін қалаушы, белгілі кәсіпкер Юрий Цхай «Астана» халықаралық қаржы орталығы (АХХО) алаңында Caspian Integrity Group Ltd компаниясын тіркеді. Бұл туралы Kapital.kz іскерлік ақпарат орталығы орталықтың тәуелсіз реттеушісі – AFSA-ға сілтеме жасап хабарлайды.
Компания АХХО-да 2026 жылғы 17 маусымда тіркелген. Оның қызмет бағыты «холдингтік» деп көрсетілген, ал басқарушы директоры (CEO) – Юрий Цхай.
Юрий Цхай негізін 1992 жылы қалаған Caspian Group холдингі девелопмент, өнеркәсіп, құрылыс, металл өңдеу, білім беру, трейдинг және қаржы салаларында жұмыс істейді.
Топтың портфеліне мынадай активтер кіреді:
• «ALCAS» ЖШС – Алматы облысындағы бетон қоспаларын өндіруші әрі жеткізуші. Жоба оңтүстіккореялық «Alpha Network GMBH» корпорациясымен бірлесіп іске қосылған.
• Caspian Steel QZ – «Caspian Integrity» ЖШС, «ТехноФьюжн» АҚ және «КапиталСолюшенс» ЖШҚ бірлескен кәсіпорны. 2013 жылғы желтоқсанда ашылған зауыт Қазақстанда болат прокатын шығарады. Өнімдері ішкі нарықтан бөлек Ресей, Украина, Тәжікстан және Қырғызстанға экспортталады.
• Korean House Restaurants – корей және паназия асханасының мейрамханалар желісі.
• «Достар» білім беру кешені – балабақша мен бастауыш және жоғары сыныптарға арналған мектеп-лицейлер.
Холдинг құрамында екі трейдингтік компания бар: «Каспиан Трейд» және «Каспиан Трейд НС». Алматыдағы металл прокаты нарығында жұмыс істейтін бірінші компания ТМД-ның ірі зауыттарынан өнім жеткізеді, негізінен топтың өз зауыты – «Caspian Steel QZ» өнімдерін саудалайды. Астанадағы екінші компания тікелей өндірушіден А500С класты арматура, болат құбырлар мен фасонды прокат жеткізумен айналысады.
Сонымен қатар топтың қоржынында бірнеше құрылыс жобасы бар. Соның ішіндегі ең ірісі – аумағы 88 мың гектарды құрайтын «Alatau City» ақылды қаласын жобалау және салу. Бұл аумаққа Іле мен Талғар аудандарының бір бөлігі және Қонаев қаласы кіреді. Холдинг сайтында Alatau City-дің жекелеген аймақтарына арнайы экономикалық аймақ мәртебесі берілетіні жазылған.
Жаңа қала аумағында мынадай нысандарды дамыту жоспарлануда:
• экспортқа бағытталған сауда-логистикалық орталық;
• шағын және орта бизнес, IT-сектор және қаржы ұйымдарына арналған бизнес-парк;
• болашақ әуежай мен теміржол тораптарының жанынан бой көтеретін интеграцияланған өнеркәсіптік-логистикалық парк;
• халықаралық деңгейдегі білім беру инфрақұрылымы, медициналық және спорттық туризмді қамтитын ойын-сауық және туризм орталығы;
• жаңа халықаралық әуежай салып, негізгі нарықтармен әуе қатынасын жақсарту.
Бұған дейін Алатау қаласының инфрақұрылымын тарту үшін мемлекеттік қарыз алуға рұқсат берілетіні белгілі болған. Болашақ шаһардың инвестициялық портфеліне құны 2 трлн теңге болатын жобалар пулы енген.
Еске сала кетейік, 2025 жылғы мамырда сингапурлық Surbana Jurong компаниясымен бірлесіп әзірленген жаңа қаланың Бас жоспары қабылданды. Ал 2026 жылғы мамырда Президент Қасым-Жомарт Тоқаев «Алатау қаласының арнайы құқықтық режимі туралы» Қазақстан Республикасының Конституциялық заңына қол қойды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
