Қазақстанда жаңа мемлекеттік марапаттар енгізіледі
Сенат Al-Farabi, Qoja Ahmet Yasaui және «Мейірім» ордендерін енгізуді мақұлдады
Сенат депутаттары «Қазақстан Республикасының мемлекеттік наградалары туралы» заңға енгізілген түзетулерді қолдады. Өзгерістер елдің қазіргі қоғамдық сұраныстары мен стратегиялық басымдықтарын ескере отырып, марапаттау жүйесін жаңартуды көздейді, деп хабарлайды Kapital.kz іскерлік ақпарат орталығы.
«Заңдағы басты жаңалық – ордендер тізбесін жаңа марапаттармен толықтыру. Атап айтқанда, «Al-Farabi», «Qoja Ahmet Yasaui» және «Мейірім» ордендерін енгізу қарастырылған. «Al-Farabi» ордені білім мен ғылым, мәдениет және рухани даму салаларындағы Қазақстан Республикасына сіңірген ерекше еңбегі мен елеулі жетістіктері үшін беріледі. Бұл мемлекет тарапынан зияткерлік еңбекке, ғылымға, білімге және мәдени дамуға берілген жоғары бағаны көрсетеді», – деді сенатор Айгүл Қапбарова пленарлық отырыста.
«Qoja Ahmet Yasaui» ордені мемлекет құру ісіне, гуманитарлық, мәдени және әлеуметтік салалардың дамуына үлес қосқан қазақстандық және шетелдік ғалымдарға, қоғам және мемлекет қайраткерлеріне табысталады. Заң жобасын әзірлеушілердің пікірінше, бұл марапат түркі әлемінің рухани мұрасы мен тарихи сабақтастығының маңызын айқындайды.
Ал «Мейірім» ордені қайырымдылық, меценаттық және қоғамдық қызмет саласында ерекше көзге түскен азаматтарға беріледі. Бұл бастама гуманизм, мейірімділік және әлеуметтік жауапкершілік құндылықтарын қолдауға бағытталған.
«Сонымен қатар заңда мемлекет басшысының шешімі бойынша белгіленген мерзімдерді сақтамай-ақ, айрықша жағдайларда марапаттау мүмкіндігі қарастырылған. Бұл норма мемлекеттік наградалар жүйесінің икемділігін арттырып, ерекше жетістіктерді дер кезінде бағалауға мүмкіндік береді. Бұдан бөлек, бірқатар баптарға редакциялық нақтылаулар енгізіліп, қолданыстағы құқықтық олқылықтар жойылады. Заң жобасы мүдделі мемлекеттік органдардың ұсыныстары, сарапшылар қауымдастығы және құқық қолдану тәжірибесі ескеріле отырып дайындалды», — деді депутат.
Еске салайық, «Әл-Фараби» орденін құруды арезидент Қасым-Жомарт Тоқаев осы жылдың сәуір айында ғалымдарды марапаттау рәсімі барысында ұсынған болатын.
«Бұл салтанатты іс-шарада тағы бір жақсы жаңалықпен бөліскім келеді. Кең байтақ Ұлы даламыз әлемге көптеген көрнекті тұлғаларды сыйлағаны белгілі. Солардың ішінде әлемге әйгілі философ әл-Фараби ерекше орын алады. Оның мұрасы – өркениет биігі, бүкіл адамзаттың баға жетпес қазынасы. Осыған байланысты «Әл-Фараби» орденін құру қажет деп санаймын. Бұл жоғары марапат білім мен ғылым, мәдениет және рухани өмір салаларында елеулі жетістікке жеткен азаматтарға беріледі. Биыл Республика күні қарсаңында алғаш рет «Мейірім», «Қожа Ахмет Ясауи» және «Әл-Фараби» ордендері табысталатын болады», – деді мемлекет басшысы.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
