Apple кірістірілген камерасы бар AirPods құлаққаптарын шығаруды жоспарлап отыр
Инсайдерлердің хабарлауынша, корпорация өз өнімдерінің топтамасын ауқымды түрде жаңартуға дайындалуда, олардың қатарында мерейтойлық iPhone мен бүктемелі смартфон да бар
Bloomberg агенттігінің сенімді дереккөздерге сілтеме жасап хабарлауынша, Apple Inc. 2027 жылдың соңында кірістірілген камерасы бар AirPods құлаққаптарын және басқа да бірнеше жаңа өнімдерін нарыққа шығарады. Дәл осы уақытта жаңа буынның бүктемелі смартфоны мен дәстүрлі iPhone-ның кезекті моделі таныстырылмақ. «Интерфакс-Қазақстан» агенттігінің жазуынша, бұл модель брендтің 20 жылдығына орай жарық көрмек.
Бұл Apple өнімдері қатарындағы ең ірі жаңарту болады деп күтілуде. Сондай-ақ, бұл қадам компанияның жаңа бас атқарушы директоры Джон Тернус (John Ternus — қызметіне 2026 жылғы 1 қыркүйекте кіріседі) жұмысының алғашқы жылында өндірістің дамуына қосымша серпін бермек.
Дереккөздердің атап өтуінше, жаңа AirPods жасанды интеллект функциялары қолданылатын алғашқы Apple тағылатын құрылғысы болмақ. Ондағы кірістірілген камералар фото немесе видео түсіруге емес, Siri дауыстық көмекшісіне айналадағы жағдайды көрсетіп тұратын сенсор ретінде қызмет етеді. Бұл пайдаланушыларға белгілі бір нысандар немесе қоршаған орта туралы Siri-ге тікелей сұрақ қоюға мүмкіндік береді. Мысалы, қолданушы алдында тұрған азық-түліктерді көрсетіп, Siri-ден олардан кешкі асқа не дайындауға болатынын сұрай алады. Дереккөздердің айтуынша, бастапқыда бұл құлаққаптарды 2026 жылы шығару жоспарланған. Алайда компанияның жасанды интеллектке арналған бағдарламалық жасақтаманы әзірлеуде кездескен қиындықтарына байланысты бұл мерзім кейінге шегерілді.
Сонымен қатар, Apple келесі буынның өндірістік технологияларына негізделген болашақ құрылғылар үшін жаңа чиптердің тұтас жүйесін жасап жатыр. Қазіргі уақытта компания келесі жылдың күзінде шығады деп жоспарланған құрылғыларды iOS 28 (iPhone-ға арналған жаңартылған операциялық жүйе) бағдарламасымен бірге сынақтан өткізуде. Бұл жүйенің шығуы 2027 жылға жоспарланған.
Өткен аптада компания ағымдағы жылдың соңында пайдаланушыларға қолжетімді болатын iOS 27 жүйесін таныстырды. Сонымен қатар Siri дауыстық көмекшісінің жасанды интеллект негізіндегі жаңа нұсқасын көрсетті.
Еске сала кетейік, Apple компаниясы Mac Mini компьютерлері өндірісінің бір бөлігін Азиядан АҚШ-қа көшіреді. Бұл туралы компанияның бас операциялық директоры Сабих Хан (Sabih Khan) The Wall Street Journal басылымына берген сұхбатында мәлімдеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
