АҚШ стратегиялық қордан 10 млн баррельге дейін мұнай босатады
Таяу Шығыстағы қақтығыс пен бағаның өсуі аясында осындай шешім қабылданды
АҚШ-тың энергетика министрлігі Халықаралық энергетикалық агенттік жоспарлары аясында Стратегиялық мұнай қорынан (SPR) қосымша 10 млн баррельге дейін мұнайды шұғыл босату туралы бастама көтерді. Бұл туралы Интерфакс-Қазақстан ведомствоның баспасөз қызметіне сілтеме жасап хабарлайды.
Ведомство бұл мұнайды қарыз ретінде беріп, келесі жылы қосымша баррельдер түріндегі сыйақымен кері қайтаруды жоспарлап отыр.
Компаниялардан өтінімдер қабылдау дүйсенбі, 6 сәуір күні сағат 11:00-ге дейін (Орталық Америка уақыты бойынша) жалғасады.
«Бұл айырбас мұнай өңдеушілер мен нарыққа мұнайды бірден алуға мүмкіндік береді және сонымен қатар салық төлеушілердің қаражатын пайдаланбай-ақ америкалықтар үшін қосымша баррельдермен қамтамасыз етеді», — деп атап өтті энергетика министрлігі.
Мұнай Bryan Mound (Техас штаты) қоймасынан жеткізіледі.
Бұған дейін Халықаралық энергетикалық агенттік қатысушылары Таяу Шығыстағы қақтығыс аясында нарықты тұрақтандыру үшін стратегиялық қорлардан 400 млн баррель мұнай босату туралы келіскен болатын. Соның ішінде АҚШ 172 млн баррель бөлуге міндеттеме алып, қазірдің өзінде Bayou Choctaw, West Hackberry (екеуі де Луизианада) және Bryan Mound қоймаларынан 45,2 млн баррель мұнай босатты.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
