• Басты бет
• Технологиялар
• Қазақстанда жусан аллергиясына қарсы жаңа препарат зерттелуде

Қазақстанда жусан аллергиясына қарсы жаңа препарат зерттелуде

Елімізде аллергияға қарсы жаңа иммундық терапия пайда болды

Қазақ ұлттық аграрлық зерттеу университеті ғалымдары жусан тозаңына қарсы аллергияға арналған препаратты зерттеудің II кезеңін бастады, деп хабарлайды Kapital.kz іскерлік ақпарат орталығы Ауыл шаруашылығы министрлігіне сілтеме жасап.

Ведомство мәліметінше, жусан тозаңына сезімталдық барлық тозаң аллергендерінің ішінде бірінші орында тұр, яғни 30%-ды құрайды. Әсіресе Алматы қаласы үшін өзекті. Себебі мегаполисте жусанның гүлдеу кезеңі шілдеден қарашаға дейін жалғасады.

«Қолданыстағы емдеу тәсілдері негізінен ауру белгілерін уақытша жеңілдетуге бағытталған, дерттің негізгі себебін толық жоймайды. Ал дәстүрлі аллерген-спецификалық иммунотерапия бірнеше жыл бойы ұзақ ем қабылдауды әрі препараттарды бірнеше мәрте енгізуді талап етеді. Қазақстанның Денсаулық сақтау министрлігі ғылыми-техникалық бағдарламасы аясында ғалымдар PollenVax атты жаңа отандық препаратты әзірледі. Препарат OtarBioPharm базасында халықаралық GMP стандартына сәйкес өндірілуде», делінген министрлік таратқан ақпаратта.

Ғалымдардың әзірлемесі жусан тозаңы аллергенінің рекомбинантты ақуызы негізінде жасалған. Оның басты ерекшелігі — емдеу курсының едәуір қысқартылуы. Терапия аптасына бір рет жасалатын төрт теріасты инъекциясынан тұрады.

«Бұған дейін 30 еріктінің қатысуымен клиникалық зерттеудің I кезеңі сәтті аяқталды. Зерттеу нәтижесінде препараттың қауіпсіздігі дәлелденіп, адам ағзасына жақсы қабылданатыны анықталды. Сондай-ақ аллергенді бейтараптандыратын антиденелердің түзілуі және терілік прик-тест нәтижелері бойынша аллергенге сезімталдықтың төмендеуі секілді оң иммунологиялық көрсеткіштер тіркелді. Қазіргі таңда II кезеңдегі клиникалық зерттеуді өткізуге ресми рұқсат берілді», деп қосты ведомствода.

Айта кетейік, зерттеуге жусан тозаңынан туындаған аллергиялық риниті расталған, жасы 18 бен 65 жас аралығындағы 138 пациент қатысты. Ал зерттеуге қатысу мерзімі 180 күнге дейін созылады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз