Қазақстанда биыл дәнді дақылдар егіс алқабы 127 мың гектарға қысқарады
Елде бидай, күріш және мақта аз өсіріледі
Ауыл шаруашылығы министрлігі әкімдіктермен бірлесіп егіс алқаптарының құрылымын қалыптастырды. Осылайша, жалпы егіс көлемі 23,8 млн гектарды құрап, өткен жылмен салыстырғанда 180 мың гектарға артты. Бұл туралы үкімет отырысында ауыл шаруашылығы вице-министрі Азат Сұлтанов мәлімдеді, деп хабарлайды Kapital.kz іскерлік ақпарат орталығы.
Оның айтуынша, басымдық жоғары табысты дақылдарға берілген. Биыл олардың егіс көлемі ұлғаяды. Атап айтқанда, майлы дақылдар алқабы 4 млн гектардан асады (74 мың гектарға кеңейеді), ал мал азығы дақылдарының көлемі 3,3 млн гектарға жетеді (237 мың гектарға ұлғаяды).
«Сонымен қатар жүгеріні қайта өңдеу бойынша іске қосу жоспарланған инвестициялық жобаларды шикізатпен қамтамасыз ету мақсатында жүгері алқабы 265 мың гектарға дейін кеңейтіледі. Сондай-ақ ішкі нарықты әлеуметтік маңызы бар азық-түлік тауарларымен қамтамасыз ету үшін ұйымдасқан шаруашылықтардағы картоп егісі 10 мың гектарға ұлғайтылмақ. Бекітілген егіс құрылымы ішкі сұранысты толық қамтамасыз етуге қажетті өнім көлемін алуға мүмкіндік береді әрі нарық конъюнктурасы мен сыртқы сұранысты ескереді», – деді вице-министр.
Елде егіс алқаптарын одан әрі әртараптандыру жұмыстары жалғасып жатыр. Биыл дәнді дақылдар көлемі 127 мың гектарға қысқарады. Оның ішінде бидай алқабы 125 мың гектарға азайып, 12,1 млн гектарды құрайды.
Сондай-ақ су ресурстарына түсетін жүктемені азайту мақсатында су ресурстары және ирригация министрлігінің деректері негізінде күріш пен мақта алқаптарын оңтайландыру жұмыстары жүргізіліп жатыр.
«Мемлекет басшысының тапсырмасына сәйкес, биыл алғаш рет егіс құрылымы нақты су лимитіне сай бекітілді. Республика бойынша күріш алқабы 20,2 мың гектарға қысқартылды. Мақта алқабы 162,4 мың гектарды құрайды. Оның ішінде тамшылатып суару қолданылатын жер көлемі 29,8 мың гектарға ұлғаяды, ал дәстүрлі суару әдістері пайдаланылатын алқаптар 12 мың гектарға қысқарады», – деді Азат Сұлтанов.
Қазіргі уақытта егіс жұмыстары іс жүзінде барлық өңірде басталды. Жалпы 4,5 млн гектар жерге егін егілді. Оның ішінде дәнді дақылдар – шамамен 2 млн гектар, майлы дақылдар – 1 млн гектардан астам, мал азығы дақылдары – 388 мың гектар, көкөніс-бақша дақылдары мен картоп – 206,3 мың гектар, мақта – 154 мың гектар.
«Егіс науқанына дейін топырақ дайындау жұмыстары жүргізілді. Оның ішінде ылғал жабу, топырақты егіске дейін өңдеу және көктемгі жырту бар. Сонымен қатар министрлік жалпы көлемі шамамен 400 мың гектарды құрайтын күздік дақылдардың жай-күйіне мониторинг жүргізіп жатыр. Қазіргі кезде күздік егістің 94%-ы оңтайлы жағдайда», – деді спикер.
Оның айтуынша, биыл Ауыл шаруашылығы министрлігі егіс науқанының барысы туралы деректерді жинау және мониторинг жүргізуге арналған цифрлық құралды іске қосты. Қазір ол пилоттық режимде сынақтан өтіп жатыр.
«Бұл шешім көктемгі дала жұмыстарының барысы, егіс құрылымы мен көлемі туралы мәліметтерді жедел алуға, сондай-ақ ағымдағы жағдайды бақылауға арналған жиынтық талдамалық ақпарат қалыптастыруға мүмкіндік береді. Алдағы уақытта функционалды кезең-кезеңімен дамыту, соның ішінде өндірістік процестерді талдау және болжау үшін аналитика құралдары мен жасанды интеллект элементтерін енгізу көзделіп отыр. Бұл деректер алмасуды автоматтандыруға, мониторинг дәлдігін, шешім қабылдау жеделдігін және басқару тиімділігін арттыруға мүмкіндік береді», – деді вице-министр.
Бұған дейін Қазақстанда ауыл шаруашылығы жерлерін ұтымды пайдалану жоспары әзірленетіні хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
