Қарағандылық оқушылар GPS-сыз жұмыс істейтін құтқарушы робот жасады

Қарағанды қаласындағы «Мұрагер» мектебінің 11-сынып оқушылары төтенше жағдайларда адамдарды іздеуге арналған инновациялық робот әзірледі. Ерекшелігі — құрылғы спутниктік байланыссыз және GPS жүйесінсіз жұмыс істей алады, деп хабарлайды Kapital.kz іскерлік ақпарат орталығы.

A.C.T.I.V.E деп аталатын жоба шахталарда, түтін басқан ғимараттарда және үйінділер астында тиімді жұмыс істеуге арналған. Әзірлеушілердің айтуынша, роботтың негізінде Local Pathing есептеу архитектурасы жатыр, бұл жүйе спутниктік навигациясыз-ақ қысқа қашықтықтарда бағытты дәл анықтауға мүмкіндік береді.

Жоба авторларының бірі Санжар Сәрсембаевтың сөзінше, робот спутниктік сигнал қолжетімсіз ортада өздігінен бағдар таба алады. Құрылғының модульдік жүйесі оны әртүрлі салада қолдануға мүмкіндік береді — өнеркәсіптен бастап тау-кен металлургиясына және өрт кезіндегі құтқару операцияларына дейін.

Жобаны Санжар Сәрсембаев Тарғын Файзулла және Арнұр Тоғамбаевпен бірге жүзеге асырған. Команда бір жыл ішінде роботтың бірнеше нұсқасын әзірлеп, алгоритмдерін жетілдіріп, құрылғыны жарыс деңгейіне дейін жеткізген.

Нәтижесінде A.C.T.I.V.E жобасы Infomatrix Asia 2026 халықаралық олимпиадасында Hardware Control санаты бойынша бірінші орынды иеленді.

Бұл жетістік авторлардың бірі үшін жаңа мүмкіндіктер ашты. Санжар Сәрсембаев Алматы энергетика және байланыс университетінің білім грантын жеңіп алғанын атап өтті. Оның айтуынша, ол болашақта робототехника және IT саласында білімін жалғастырып, автономды жүйелерді дамытуға үлес қосуды жоспарлап отыр.

Команда алдағы уақытта жобаны әрі қарай жетілдіріп, роботты нақты құтқару операцияларында қолдануға бейімдеуді көздеп отыр.