Қазақстанда жыл соңына дейін 6 мыңнан астам ирригациялық канал цифрландырылмақ
Қазіргі таңда су ресурстарының ұлттық ақпараттық жүйесі 22 мың су нысанын қамтиды
Қазақстанның оңтүстік өңірлерінде жалпы ұзындығы 968 шақырым және суармалы аумағы 65 мың гектарды құрайтын 103 ирригациялық каналды автоматтандыру басталды, деп хабарлайды Kapital.kz іскерлік ақпарат орталығы су ресурстары және ирригация министрлігінің баспасөз қызметіне сілтеме жасап.
Сондай-ақ, ведомство мәліметінше, бұған дейін жаңғыртудан өткен жалпы ұзындығы 1184 шақырым болатын 270 каналды автоматтандыру жұмыстары жүргізілуде. Бұдан бөлек, ирригациялық каналдарды реконструкциялау, автоматтандыру элементтерін енгізу және су есебінің заманауи жүйелерін орнату бойынша 264 жобаға жобалық-сметалық құжаттама әзірленуде.
«Цифрлық құралдарды енгізу арқылы министрлік су ресурстарын басқарудың кешенді, көпдеңгейлі жүйесін кезең-кезеңімен қалыптастырып жатыр. Бұл тәсіл экономиканың түрлі салаларының тұрақты дамуын қамтамасыз етуге, елдің су қауіпсіздігін кепілдендіруге және осы өмірлік маңызды ресурсты болашақ ұрпақ үшін сақтауға мүмкіндік береді», – деді су ресурстары және ирригация министрі Нұржан Нұржігітов.
Қазіргі уақытта министрлік әзірлеген су ресурстарының ұлттық ақпараттық жүйесі 22 мың су нысанын: 17 мыңнан астам өзен, шамамен 4 мың көл және гидротехникалық құрылыстардың 60%-ын қамтиды. Жыл соңына дейін 6 мыңнан астам каналды цифрландыру және гидротехникалық құрылыстарды қамтуды 100%-ға жеткізу жоспарланып отыр.
Бұл елдің бірыңғай су балансын қалыптастыруға мүмкіндік береді, ол су ағынын, су қоймаларындағы жинақты және суды тұтынуды су шаруашылығы учаскелері бөлінісінде салыстыруға жағдай жасайды. Гидротехникалық құрылыстар мен су нысандарының қауіпсіздігіне ерекше назар аударылуда. Сонымен қатар, ғарыштық мониторинг пен гидробекеттердің деректері біріктірілуде.
Бұған дейін Түркістан облысында 143 шақырым ирригациялық желіні реконструкциялау басталғаны хабарланған болатын. Су ресурстарының ұлттық ақпараттық жүйесін өнеркәсіптік пайдалануға беру осы жылдың екінші жартысына жоспарланған. 2026 жылы Қазақстанда топтық су құбырларын жаңғырту бойынша 12 жоба іске асырылады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
