Атырау футбол клубы үш есе арзан бағаға сатылды
Футбол клубының нарықтық құны 250,8 млн теңгені құраған болатын
«Атырау» футбол клубы e-qazyna порталы арқылы 77 млн теңгеге сатылды, бұл оның нарықтық құнынан 3,2 есе төмен, деп хабарлайды Kapital.kz іскерлік ақпарат орталығы.
Сауда-саттық 2026 жылғы 17 сәуірде өтті. Бастапқы баға 75 млн 242 мың теңгені құрады. Аукцион құнды көтеру әдісімен өткізілді. Оған қатысу үшін 37,6 млн теңге көлемінде кепілдік жарна төлеу талап етілді.
Бұл активті сауда-саттықтың жалғыз қатысушысына сатуға рұқсат етілді.
Футбол клубы айтарлықтай жеңілдікпен сатылды, себебі бағалау бойынша оның нарықтық құны 250,8 млн теңгені құраған еді, бұл сату бағасынан 3,2 есе жоғары.
Айта кетейік, клубты өткізу бойынша сауда-саттық бірнеше рет өткізілді, бұл ретте футбол клубының бағасы үнемі төмендеп отырды. 2026 жылғы 17 ақпанда оны 250,8 млн теңгеге сату жоспарланған болатын, бірақ сауда-саттық өтпей қалды. 10 наурызда – 175,5 млн теңгеге, сауда-саттық тағы да өткен жоқ. 27 наурызда – 125,4 млн теңгеге қойылды, аукцион кезекті рет өтпеді.
Нысанды сатушы – Атырау облысының мемлекеттік сатып алу және коммуналдық меншік басқармасы, ал клубтың иесі – Атырау облысының дене шынықтыру, спорт және туризм басқармасы.
«Атырау» футбол клубы кәсіби командалық турнирлерге 1980 жылдан бастап қатысып келеді. Бастапқыда команда «Прикаспиец» деп аталған. 2000-жылдардың басында клуб қайта ұйымдастырылып, атауы «Ак Жайык» болып өзгертілді, кейін команда атауын «Атырау» деп ауыстырды», - делінген клубты бағалау туралы есепте.
Еске сала кетейік, 2025 жылғы қыркүйекте Президент Туризм және спорт министріне футбол клубтарын жекешелендіруді жеделдетуді тапсырған болатын. Қазан айында Премьер-министр Олжас Бектенов футбол клубтарын коммерцияландыру бойынша әлеуетті инвесторлармен жұмыс жүргізіліп жатқанын хабарлады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
