Кирил Бачваров Halyk Bank басқарма төрағасының орынбасары болып тағайындалды

Home Credit Bank-тің бұрынғы басшысы Кирил Бачваров Halyk Bank басқарма төрағасының орынбасары болып тағайындалды. Бұл туралы қаржы институтының Лондон қор биржасында жарияланған хабарламасында айтылған, деп хабарлайды Kapital.kz іскерлік ақпарат орталығының тілшісі.

«Halyk Bank директорлар кеңесі 2026 жылғы 1 сәуірден бастап Кирил Бачваровты басқарма мүшесі, банк басқарма төрағасының орынбасары ретінде тағайындау туралы шешім қабылдады. Ол жеке тұлғаларға банктік қызмет көрсету (B2C) бағытына жауапты болады», – делінген хабарламада.

Еске салайық, 2025 жылғы 27 маусымда ForteBank Home Credit Bank (Қазақстан) акцияларының 100%-ын сатып алу жоспарын жариялаған болатын. Мәміле бойынша келіссөздер шамамен үш айға созылған. Сол кезеңде Home Credit Bank басқарма төрағасы қызметін атқарған Кирил Бачваров Kapital.kz-ке берген сұхбатында банкті сату себептері туралы айтқан еді.

2025 жылдың тамыз айының соңында PPF Group N.V. басшысы және Home Credit Bank (Қазақстан) ірі акционері, чех кәсіпкері Иржи Шмейц банктің мажоритарлық иесіне айналды. Ол банктегі үлесін 34,7%-дан 90,1%-ға дейін арттырды. Нәтижесінде акционерлер құрамы: Иржи Шмейц – 90,09744913% дауыс беруші акция; PPF Financial Holdings a.s. – 9,90255087% болды.

Сол жылдың қыркүйегінде ForteBank қаржы реттеушісінен Home Credit Bank-тің банктік холдингі мәртебесін алу және банктің капиталына елеулі қатысуға рұқсат алды. 25 қыркүйекте ForteBank-ке Home Credit Bank-тегі 26,8% үлес тиесілі болғаны белгілі болды. Кейінірек банк заңды атауын «Home Credit Bank» АҚ (ForteBank АҚ еншілес банкі) деп өзгерткені хабарланды.

Сондай-ақ ForteBank-тің Home Credit Bank-тегі 26,8% үлесті 46,1 млрд теңгеге сатып алғаны жарияланды. Сол айда банк HCB акцияларының бақылау пакетін иеленіп, өз үлесін 75%-ға дейін ұлғайтқанын хабарлады.

2025 жылғы 11 желтоқсанда Home Credit Bank (ForteBank АҚ ЕБ) директорлар кеңесі Шолпан Нұрымбетті басқарма төрағасы етіп тағайындау туралы шешім қабылдады. Сол кезде Кирил Бачваров интеграция жөніндегі кеңесші қызметіне ауысқаны айтылған еді.

2025 жылғы 30 желтоқсанда ForteBank «Home Credit Bank» АҚ акцияларының 100%-ын сатып алу мәмілесінің аяқталғанын жариялады. Осылайша банк аталған қаржы институтының жалғыз акционеріне айналды.

Кирил Бачваров 2022-2025 жылдары Home Credit Bank басқарма төрағасы қызметін атқарды. Ол 1973 жылы Болгарияда дүниеге келген. 1996 жылы Болгариядағы Америкалық университетті (AUBG) «іскерлік әкімшілендіру және менеджмент» мамандығы бойынша тәмамдаған. 2012 жылы Италияның Милан қаласындағы SDA Bocconi университетінде MBA дәрежесін алған. Халықаралық қаржы ұйымдарында маркетинг, корпоративтік коммуникациялар және клиенттік тәжірибе бағыттарында 20 жылдан астам жұмыс тәжірибесі бар.