Түркістан маңында үлкен экопарк салынады
Саябақтың аумағында 10 мың ағаш отырғызылады
2026 жылы Түркістан қаласында 50 гектар аумақта экопарк салу жоспарланып отыр. Ол «Жасыл аймақ» коммуналдық мемлекеттік мекемесіне тиесілі аумақта орналасады, деп хабарлайды Kapital.kz іскерлік ақпарат орталығының тілшісі әкімдіктің баспасөз қызметіне сілтеме жасап.
«Экопарк аумағында шамамен 10 мың көшет отырғызу жоспарланған. Өңірдің табиғи-климаттық ерекшеліктеріне бейімделген тораңғы, үйеңкі, акация, терек және өрік секілді ағаш түрлеріне басымдық беріледі. Қазіргі уақытта болашақ парк аумағында тазалау, көгалдандыру және демалушылар үшін қолайлы орта қалыптастыруға дайындық жұмыстары жүргізілуде. Жұмыстарға 150 адам мен 10 бірлік арнайы техника тартылған», – делінген хабарламада.
Айта кетейік, Нұралхан Көшеров болашақ экопарк орнына барып, оны жобаға жауапты тұлғалармен талқылады.
Бұған дейін Астана маңында үш экопарк түрін құру жоспарланып жатқаны белгілі болған еді. Олар күнделікті демалысқа, демалыс күнгі сапарларға және туризмді дамытуға бағытталмақ. Жетісу өңірінде 2026 жылы Талдықорған, Текелі және Сарқан қалаларының маңында да үш экопарк салу жоспарланған. 2025 жылдың желтоқсанында Қасым-Жомарт Тоқаев үкіметке өңір әкімдерімен бірлесіп ірі мегаполистер мен облыс орталықтарының қала маңы аймақтарында экопарктер құру бойынша шаралар қабылдауды тапсырған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
